ఇక జనరల్ మోటార్స్ ఆర్ధిక శాఖ ముఖ్య అధికారిగా దివ్య సూర్యదేవర

గూగుల్‌, మైక్రోసాఫ్ట్‌ వంటి అగ్రగామి సంస్థల్లో ప్రవాస భారతీయులు అత్యున్నత పదవులను అలంకరించి భారత ఖ్యాతిని ప్రపంచవ్యాప్తం చేశారు. ఈ కోవకు చెందిన వారే ప్రవాస భారతీయురాలు దివ్య సూర్యదేవర.. అమెరికా ఆటోమొబైల్‌ రంగంలోనే అతిపెద్ద కంపెనీ అయిన జనరల్‌ మోటార్స్‌(జీఎం)కు ఆమె చీఫ్‌ ఫైనాన్స్‌ ఆఫీసర్‌(సీఎఫ్‌వో)గా నియమితులయ్యారు. ఈ మేరకు జీఎం సంస్థ ఓ ప్రకటనలో తెలిపింది. ప్రస్తుతం దివ్య సంస్థ కార్పొరేట్‌ ఫైనాన్స్‌ విభాగం వైస్‌ ప్రెసిడెంట్‌గా విధులు నిర్వర్తిస్తున్నారు. ప్రస్తుత సీఎఫ్‌వో చక్‌ స్టీవెన్స్‌ సెప్టెంబరు 1న పదవి నుంచి తప్పుకోనున్న నేపథ్యంలో దివ్య బాధ్యతలు స్వీకరించనున్నారు. 2019 మార్చిలో స్టీవెన్స్‌ ఉద్యోగ విరమణ చేస్తారు. అప్పటివరకు ఆయన సంస్థ సలహాదారునిగా సేవలందిస్తారని జీఎం పేర్కొంది. 1978లో జనరల్ మోటార్స్‌లో చేరిన ఆయన.. సంస్థ అభివృద్ధిలో కీలక పాత్ర పోషించారు.చెన్నైలో జన్మించిన 39 ఏళ్ల దివ్య సూర్యదేవర 2017 జులై నుంచి జనరల్ మోటార్స్‌ కార్పొరేట్‌ ఫైనాన్స్‌కు వైస్‌ ప్రెసిడెంట్‌గా పనిచేస్తున్నారు. 2014 నుంచి జీఎం సీఈవోగా మేరీ బార్రా బాధ్యతలు నిర్వర్తిస్తున్నారు. ఆటో మొబైల్‌ రంగంలోని ఓ సంస్థ అత్యున్నత స్థానాల్లో ఇద్దరు మహిళలే ఉండటం ఇదే మొదటిసారి. ‘గత కొన్నేళ్లుగా సంస్థ ఆర్థిక పురోగతికి దివ్య అనుభవం, నాయకత్వ లక్షణాలు ఎంతో పనికొచ్చాయని’ జనరల్‌ మోటార్స్‌ సీఈవో మేరీ బార్రా అభిప్రాయపడ్డారు. దివ్యతో కలిసి సంస్థ అభివృద్ధికి కృషి చేస్తానని ఈ సందర్భంగా బార్రా తెలిపారు.దివ్య సూర్యదేవర యూనివర్శిటీ ఆఫ్‌ మద్రాస్‌ నుంచి కామర్స్‌ విభాగంలో డిగ్రీ, పీజీ పట్టాలను అందుకొన్నారు. 22 ఏళ్ల వయసులో హార్వర్డ్‌ వర్శిటీలో ఎంబీఏ చేయడానికి మొదటిసారిగా అమెరికా వెళ్లారు. 2005లో జీఎంలో చేరకముందు యూబీఎస్‌, ప్రైస్‌వాటర్‌ హౌస్‌కూపర్స్‌ సంస్థల్లో ఆర్థిక విశ్లేషకర్తగా సేవలందించారు.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

© 2018 TNILIVE. All rights reserved. Write to us with suggestions, comments and questions - editor.tnilive@gmail.com