గంజాయికు పతంజలి మద్దతు

ఆయుర్వేద ఉత్పత్తులతో దేశంలోని బడా కార్పొరేట్ సంస్థల ఆదాయానికి భారీగా గండికొట్టిన పతంజలి.. తాజాగా గంజాయి చట్టబద్ధత కోసం పోరాడుతున్న వారికి మద్దతుగా నిలిచింది. భారత దేశంలో నిషేధంలో ఉన్న గంజాయికి ఆయుర్వేదంలో మంచి ప్రాధాన్యత ఉందనీ.. వెంటనే దాన్ని చట్టబద్ధం చేయాలంటూ ఆ కంపెనీ సీఈవో ఆచార్య బాలకృష్ణ డిమాండ్ చేశారు. గంజాయిని సాగును చట్టబద్ధం చేయాలంటూ పలువురు రాజకీయ నేతలు ఒత్తిడి పెంచుతున్న నేపథ్యంలోనే… రామ్‌దేవ్ బాబా నేతృత్వంలోని పతంజలి ఆయుర్వేద సంస్థ కూడా ఈ వాదనకు మద్దతివ్వడం గమనార్హం. ఇటీవల ఆచార్య బాలకృష్ణ ఓ ఇంటర్వ్యూలో మాట్లాడుతూ.. ‘‘పురాతన కాలం నుంచి గంజాయి మొక్కలోని కొన్ని భాగాలకు ఆయుర్వేదంలో ఔషధ పరంగా మంచి ప్రాధాన్యత ఉంది. అందుకే మేము దీనిపై పరిశోధనలు జరుపుతున్నాం. గంజాయి మొక్కల వల్ల ప్రయోజనాలు, సక్రమ వినియోగంపై దృష్టి పెట్టాలని ఆశిస్తున్నాం..’’ అని పేర్కొన్నారు. హరిద్వార్‌లోని పతంజలి పరిశోధన, అభివృద్ధి కేంద్రంలో 200 మంది శాస్త్రవేత్తలు దేశంలోని దాదాపు 200 మొక్కలు, వాటి ప్రయోజనాలు, వైద్యావసరాలపై పరిశోధనలు జరుపుతున్నారన్నారు. ప్రత్యేకించి గంజాయి గింజల వల్ల చాలా ప్రయోజనాలు ఉన్నాయనీ… గంజాయి నూనెలోని విషపూరిత పదార్థాలుగా భావించే టీహెచ్‌సీ వంటి పదార్థాలను వేరుచేసి వినియోగంలోకి తేవచ్చునన్నారు. కెనడా, అమెరికాలోని కొన్ని రాష్ట్రాలతో పాటు విదేశాల్లో గంజాయి వినియోగం, ఆదాయం విస్తృతంగా ఉందన్నారు. అయినప్పటికీ మన దేశంలో మాత్రం చట్ట వ్యతిరేకంగా పరిగణిస్తున్నారన్నారు. ‘‘గంజాయిని నేరపూరితంగా చూడడం వల్ల ప్రజలకు పూర్తి స్థాయిలో వ్యాపార అవకాశాలను నిరాకరిస్తున్నారు…మన దేశంలో ఎందుకు దీనిని చట్టబద్ధం చేయకూడదు…’’ అని ఆయన ప్రశ్నించారు. కాగా భారత దేశంలో నార్కోటిక్ డ్రగ్స్, సైకోట్రోపిక్ పదార్థాల చట్టం కింద గంజాయి సాగు, అమ్మకం, వినియోగంపై 1985 నుంచి పూర్తి నిషేధం కొనసాగుతున్న సంగతి తెలిసిందే.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

© 2018 TNILIVE. All rights reserved. Write to us with suggestions, comments and questions - editor.tnilive@gmail.com