సీబీఐ రంగంలోకి దిగింది. ఎమ్మెల్యేను అరెస్టు చేసింది.

ఉన్నావ్‌ సామూహిక అత్యాచార కేసులో భాజపా ఎమ్మెల్యే కుల్‌దీప్‌ సింగ్‌ సెంగార్‌ను కేంద్ర దర్యాప్తు సంస్థ(సీబీఐ) అదుపులోకి తీసుకుంది. ఆయనపై సీబీఐ మూడు వేర్వేరు కేసులను నమోదు చేసింది. ఉత్తరప్రదేశ్‌ పోలీసులు నిన్న సెంగార్‌పై ఎఫ్‌ఐఆర్‌ నమోదు చేసినప్పటికీ అరెస్ట్‌ చేయకపోవడంపై వివాదం నెలకొంది. అయితే కేసు సీబీఐకి అప్పగిస్తున్నందున ఆయనను అదుపులోకి తీసుకునే అంశం దర్యాప్తు సంస్థ చూసుకుంటుందని పోలీసులు స్పష్టంచేశారు. ఎట్టకేలకు ఈరోజు ఉదయం సీబీఐ ఆయనను కేసు విషయంలో ప్రశ్నించేందుకు అదుపులోకి తీసుకుంది. లఖ్‌నవూలోని సీబీఐ కార్యాలయంలో అధికారులు సెంగార్‌ను ప్రశ్నిస్తున్నారు. నిన్న ఉత్తరప్రదేశ్‌ ప్రభుత్వం ఈ కేసు విచారణ చేపట్టాలని సీబీఐని అభ్యర్థించడంతో సీబీఐ రంగంలోకి దిగింది. సామూహిక అత్యాచారం, ఆ తర్వాత జరిగిన ఘటనల నేపథ్యంలో సెంగార్‌పై మూడు వేర్వేరు కేసులు నమోదు చేసినట్లు సీబీఐ వెల్లడించింది. బాలికపై అత్యాచారం, ఆమె తండ్రి కస్టడీలో మరణించడంపై కేసులు నమోదు చేశారు. విచారణ నిమిత్తం సెంగార్‌ను ఉదయం 5 గంటల ప్రాంతంలో సీబీఐ అధికారులు అదుపులోకి తీసుకున్నారు. ఉత్తరప్రదేశ్‌లోని ఉన్నావ్‌ జిల్లాలో 16ఏళ్ల బాలికపై సామూహిక అత్యాచారం కేసులో సెంగార్‌ ఆరోపణలు ఎదుర్కొంటున్నారు. పోలీసులకు ఫిర్యాదు చేసినా పట్టించుకోలేదని ఆమె గత వారం ఉత్తరప్రదేశ్‌ ముఖ్యమంత్రి యోగి ఆదిత్యనాథ్‌ ఇంటి ముందు ఆత్మహత్యాయత్నం చేయడంతో విషయం వెలుగు చూసింది. ఈ కేసు విషయంలో ఎమ్మెల్యే, బాధితురాలి తరఫు బంధువులకు ఘర్షణ జరిగింది. బాధితురాలి తండ్రిని ఎమ్మెల్యే సోదరుడు దారుణంగా కొట్టాడు. ఈ దాడి నేపథ్యంలో బాలిక తండ్రి జైలుపాలై కస్టడీలో మరణించారు.

More News

Leave a Reply

Your email address will not be published. Required fields are marked *

*

Enable Google Transliteration.(To type in English, press Ctrl+g)

© 2018 TNILIVE. All rights reserved. Write to us with suggestions, comments and questions - editor.tnilive@gmail.com