‘కళంక్‌’ చిత్రం… భారీ తారాగణంతో తెరకెక్కడమే కాదు అందులో కొంతమంది అందాల నాయికలు ప్రత్యేక గీతాలతో మోత మోగిస్తున్నారు. ‘ఫస్ట్‌ క్లాస్‌..’ అంటూ వరుణ్‌ధావన్‌తో కలిసి స్టెప్పులేసి కేక పెట్టించింది కియారా అడ్వాణీ. ఈ పాటకి మంచి స్పందన వచ్చింది. ఇప్పుడు మరో బాలీవుడ్‌ నాయిక కృతి సనన్‌ ఐటెమ్‌ పాటతో సందడి చేస్తోంది. ‘ఐరా గైరా…’ అంటూ సాగే ఈ గీతంలో వరుణ్‌ ధావన్‌, ఆదిత్య రాయ్‌ కపూర్‌తో కలసి కృతి వేసే స్టెప్పులు కిర్రాకు పుట్టిస్తున్నాయి. ఈ విషయాన్ని కృతి ట్విటర్‌లో పంచుకొంది. ‘ఈ పాట చాలా ప్రత్యేకమైంది. థియేటర్లో చూడాలని ఎంతో ఆసక్తిగా ఎదురుచూస్తున్నాను’’అని ట్వీటింది. మహేష్‌బాబు సరసన ‘1: నేనొక్కడినే’లో నటించి వెండితెర ఎంట్రీ ఇచ్చిన కృతి బాలీవుడ్‌లో వరస చిత్రాలతో దూసుకుపోతుంది. ఈ మధ్యే ‘లుకా చుప్పీ’తో విజయం అందుకుంది. ‘స్త్రీ’లో ప్రత్యేక గీతంలో ఆడిపాడిన ఈ నాయిక ‘కళంక్‌’లోని పాటతోనూ అదరగొట్టిందంటున్నాయి బాలీవుడ్‌ వర్గాలు. వరుణ్‌ధావన్‌, ఆలియా భట్‌, సంజయ్‌ దత్‌, మాధురీ దీక్షిత్‌, ఆదిత్యరాయ్‌ కపూర్‌ తదితరులు ప్రధాన పాత్రల్లో నటిస్తున్న ఈ చిత్రాన్ని అభిషేక్‌ వర్మన్‌ తెరకెక్కించారు. ఈ చిత్రం ఈ నెల 17న ప్రేక్షకుల ముందుకు వస్తోంది.
