నేను మోదీలా కాదు.. ఆయనలాగా అబద్ధాలు చెప్పడానికి నేను ఇక్కడికి రాలేదని కాంగ్రెస్‌ పార్టీ అధ్యక్షుడు రాహుల్ గాంధీ చెప్పారు. వయనాడ్‌లో రాహుల్ గాంధీ ఎన్నికల ప్రచారం నిర్వహించారు. ఈ సందర్భంగా రాహుల్ మాట్లాడుతూ.. వయనాడ్‌ నుంచి తన అభ్యర్థిత్వానికి మద్దతు ఇస్తున్న ప్రజలందరికి ధన్యవాదాలు చెప్పారు. ఇక్కడి ప్రజలతో జీవితాంతం మంచి సంబంధాలను నెలకొల్పుకునేందుకు ఇక్కడికి వచ్చానని తెలిపారు. ఒక కుమారుడిగా, సోదరుడిగా ఇక్కడి ప్రజలు తనను ట్రీట్‌ చేయాలని కోరారు. 2 లక్షల ఉద్యోగాలు ఇస్తానని, ప్రతి ఒక్కరి అకౌంట్‌లో రూ. 15 లక్షలు జమ చేస్తానని తాను మోదీలా అబద్ధాలు చెప్పను అని రాహుల్ స్పష్టం చేశారు. మోదీ దేశానికి చేసిందేమీ లేదని ధ్వజమెత్తారు. ఈ ప్రచారం కంటే ముందు రాహుల్ తిరునెల్లి ఆలయంలో ప్రత్యేక పూజలు నిర్వహించారు. పూజలు చేసిన అనంతరం ఆయన ఎన్నికల ప్రచారంలో పాల్గొన్నారు.
