కంగనా రనౌత్‌, రాజ్‌కుమార్‌ రావ్‌ కీలక పాత్రల్లో నటించిన చిత్రం ‘మెంటల్ హై క్యా’. ప్రకాశ్‌ కోవెలమూడి దర్శకత్వం వహించారు. మొదటిసారి టైటిల్‌ వెల్లడించడంతోనే ఈ సినిమా చుట్టూ వివాదాలు అలముకున్నాయి. మానసిక రోగులను అవమాన పరిచేలా ఈ టైటిల్‌ ఉందంటూ ‘ఇండియన్‌ సైకియాట్రిస్ట్‌ సొసైటీ(ఐపీఎస్‌), దీపికా పదుకొణె ‘ది లైవ్‌ లవ్‌ లాఫ్‌ ఫౌండేషన్‌’లు చిత్ర బృందంతో పాటు, సీబీఎఫ్‌సీ చీఫ్‌ ప్రసూన్‌ జోషికి లేఖ రాశాయి. టైటిల్‌ మార్చాలంటూ డిమాండ్‌ చేశాయి. ఈ నేపథ్యంలో ఇటీవల కంగన సీబీఎఫ్‌సీని కలిసింది. అవసరమైతే టైటిల్‌ మార్చేందుకు సుముఖంగానే ఉన్నట్లు అనంతరం మీడియాకు వెల్లడించింది. ఈ నేపథ్యంలో సినిమా పేరు ‘జడ్జిమెంటల్ హై క్యా’గా మార్చాలని అనుకుంటున్నట్లు బాలాజీ టెలీ ఫిల్మ్స్‌ తెలిపింది. ఇప్పటికే చిత్రీకరణ పూర్తి చేసుకున్న ఈ సినిమా జులై 26న ప్రేక్షకుల ముందుకు రానుంది.
