వర్షాకాలంలో చాలామందిని పాదాల పగుళ్లూ, ఇన్ఫెక్షన్లూ బాధిస్తుంటాయి. అలాంటి వారు ఇంట్లో కొన్ని నియమాలు పాటిస్తే సమస్యలు ఇట్టే దూరమవుతాయి.
* ఎప్పుడైనా పాదాలను ఎంత శుభ్రంగా ఉంచుకుంటే అంత మంచిది. వర్షంలో తడిసిన ప్రతిసారీ యాంటీబ్యాక్టీరియల్ లోషన్ కలిపిన నీళ్లలో పాదాలను కాసేపు ఉంచి కడిగేసుకుంటే ఎలాంటి చర్మసంబంధిత సమస్యలూ దరిచేరకుండా ఉంటాయి.
* మూడు చెంచాల గులాబీనీళ్లలో రెండు చెంచాల నిమ్మరసం, చెంచా గ్లిజరిన్ కలిపి కాళ్లకు రాసుకోవాలి. గంటయ్యాక కడిగేసుకుని మాయిశ్చరైజర్ రాసుకుంటే పాదాలు మృదువుగా ఉంటాయి.
* బకెట్ నీళ్లలో మూడు చెంచాల తేనె, చెంచా హెర్బల్ షాంపూ, రెండు చెంచాల బాదం నూనె వేసి పాదాలను ఉంచాలి. ఇరవై నిమిషాల తరవాత చల్లటి నీళ్లతో కడిగేసుకుంటే పొడిబారకుండా ఉంటాయి.
* ఆలివ్ నూనె, యూకలిప్టస్ ఆయిల్, రోజ్మేరీ నూనె, రోజ్ ఆయిల్ తీసుకుని ఒక బాటిల్లో నిల్వ చేసుకోవాలి. ఈ మిశ్రమంతో ప్రతిరోజూ పాదాలను మర్దన చేసుకుంటే రక్తప్రసరణ బాగా జరిగి చర్మం మృదువుగా మారుతుంది. ఒత్తిడీ దూరమవుతుంది.
