ప్రెసిడెంట్స్‌ కప్‌ బాక్సింగ్‌ టోర్నీలో భారత బాక్సర్‌ మేరీకోమ్ స్వర్ణ పతకాన్ని కైవసం చేసుకుంది. ఆదివారం మహిళల 51 కేజీల విభాగంలో ఫైనల్లో ఆస్ట్రేలియా బాక్సర్‌ ఫ్రాంక్స్‌ ఏప్రిల్‌తో జరిగిన పోరులో కోమ్‌ 5-0తో విజయం సాధించింది. ఇంతకుముందు సెమీఫైనల్లో వియత్నాంకు చెందిన అన్హ్‌ వో కిమ్‌తో జరిగిన పోరులో 3-2తో విజయం కోసం చెమటోడ్చిన మేరీకోమ్.. ఫైనల్లో మాత్రం అలవోకగా విజయం సాధించింది. బాక్సింగ్‌లో ఆరుసార్లు ప్రపంచ ఛాంపియన్‌గా నిలిచిన మేరీకోమ్ ఈ ఏడాది మేలో జరిగిన భారత ఓపెన్‌ బాక్సింగ్‌ టోర్నమెంట్‌లోనూ స్వర్ణ పతకాన్ని కైవసం చేసుకుంది. సెప్టెంబర్‌ 7నుంచి 21 తేదీల్లో రష్యాలో జరగనున్న ప్రపంచ బాక్సింగ్‌ ఛాంపియన్‌షిప్‌-2019లో మేరీకోమ్ పాల్గొననుంది.
