అమెరికాకు చెందిన మోటారుసైకిళ్ల తయారీ సంస్థ హార్లీ డేవిడ్‌సన్‌ ఎలక్ట్రిక్‌ వాహనాల తయారీని మళ్లీ ప్రారంభించింది. ఈ కంపెనీ లైవ్‌వైర్‌ పేరుతో తయారు చేసే బైకుల్లో సాంకేతిక సమస్యలు తలెత్తడంతో ఉత్పత్తిని నిలిపివేస్తున్నట్లు ఇటీవల ప్రకటించింది. ఛార్జింగ్‌కు సంబంధించిన సమస్యలు తలెత్తడంతో ఈ నిర్ణయం తీసుకొన్నట్లు వెల్లడించింది. ఈ బైకు ఓనర్లు సమస్య తీరే వరకు కేవలం డీలర్‌ కార్యాలయాల్లో మాత్రమే ఛార్జింగ్‌ చేసుకోవాలని పేర్కొంది. సమస్యను మాత్రం హార్లీ బహిర్గతం చేయలేదు. కాకపోతే అన్ని బైకుల్లో ఈ సమస్యలేదని కేవలం ఒకదానిలో మాత్రమే గుర్తించినట్లు పేర్కొంది. ‘‘గతంలో నిలిపివేసిన లైవ్‌వైర్‌ బైకుల ఉత్పత్తిని ప్రారంభించాము. ఒక్క బైకులోనే సమస్యను గుర్తించాము.ఈ వారంలో పరిస్థితిని పూర్తిగా విశ్లేషించాము. మేము లైవ్‌వైర్‌ ప్రొడక్షన్‌, డెలివరీలను పునరుద్ధరించాము’’ అని హార్లీ ఒక ప్రకటనలో వెల్లడించింది.
