ఒకప్పుడు స్టార్‌ కథానాయికయిగా వెండితెరపై ప్రేక్షకులను అలరించిన అందాల సుందరి మాధురీ దీక్షిత్‌. కొంత విరామం తర్వాత ఈ ఏడాది ‘టోటల్‌ ఢమాల్‌’, ‘కళంక్‌’ చిత్రాలతో మరోసారి ప్రేక్షకులను పలకరించారు. అడపాదడపా చిత్రాలు చేస్తున్న మాధురీ ఇప్పుడు సరికొత్త అవతారం ఎత్తనున్నారు. ప్రముఖ ఓటీటీ సంస్థ నెట్‌ఫ్లిక్స్‌ నిర్మించే వెబ్‌ సిరీస్‌లో నటించేందుకు సిద్ధమయ్యారు. ఈ విషయాన్ని నెట్‌ఫ్లిక్స్‌ అభిమానులతో పంచుకుంది.
‘ఈ వార్త వింటే మీరు దిల్‌ తో పాగల్‌ హై అనాల్సిందే. త్వరలో తెరకెక్కనున్న నెట్‌ఫ్లిక్స్‌ ఒరిజినల్‌ సిరీస్‌లో మాధురీ దీక్షిత్‌, కరణ్‌జోహార్‌ నటించనున్నారు. అందుకు మేము సిద్ధంగా ఉన్నాం’-నెట్‌ఫ్లిక్స్‌ ఇండియా
ఈ విషయాన్ని ప్రముఖ దర్శక-నిర్మాత కరణ్‌జోహార్‌ కూడా ధ్రువీకరించారు. ‘మాకు క్వీన్‌ దొరికింది. రాబోయే నెట్‌ఫ్లిక్స్‌ ఒరిజినల్‌ మరింత అందంగా హృద్యంగా ప్రేక్షకుల ముందుకు రానుంది. ఆమె తన సౌందర్యంతో డిజిటల్‌ స్పేస్‌లో మేజిక్‌ చేయనుంది’ అని పేర్కొన్నారు.
