భారత స్క్వాష్ ప్లేయర్ హరీందర్‌ పాల్ సంధూ ఇండియా టూర్‌ టోర్నమెంట్‌లో విజేతగా నిలిచాడు. పురుషుల సింగిల్స్‌ ఫైనల్లో నాలుగో సీడ్‌ హరీందర్‌ జపాన్‌కు చెందిన ఏడో సీడ్‌ ప్లేయర్ టొమోటకా ఎండోను మట్టికరిపించాడు. ప్రత్యర్థిని వరుస గేముల్లో 11-5, 11-6, 11-7తో చిత్తుచేసి టైటిల్‌ను గెలిచాడు. 31 నిమిషాల్లోనే తుదిపోరుని ముగించడం విశేషం. మరోవైపు మహిళల సింగిల్స్‌ ఫైనల్లో ఈజిప్ట్‌ క్రీడాకారిణి హనా రమదాన్‌ విజయం సాధించింది. ఇంగ్లాండ్‌ ప్లేయర్ లూసీ టర్మెల్‌ను 11-8, 6-11, 11-4, 11-3 తేడాతో ఓడించింది. తొలి గేమ్‌లో ప్రత్యర్థిపై పైచేయి సాధించిన హనా రెండో గేమ్‌లో తడబడింది. అయినా పుంజుకొని వరుస గేమ్‌ల్లో గెలిచి టైటిల్‌ దక్కించుకుంది.
