మార్చి 29 నుండి 13వ IPL సీజన్

ఐపీఎల్‌ 13వ సీజన్‌ వచ్చే ఏడాది మార్చి 29 నుంచి ప్రారంభం కానున్నట్లు తెలుస్తోంది. తొలి మ్యాచ్‌ ముంబయిలోని వాంఖడే స్టేడియంలో జరుగుతుందని దిల్లీ క్యాపిటల్స్‌కు చెందిన ఓ అధికారి తెలిపారు. ఆ సమయంలో అంతర్జాతీయ మ్యాచ్‌లు ఉన్న కారణంగా ఆస్ట్రేలియా, ఇంగ్లాండ్‌, న్యూజిలాండ్‌, శ్రీలంకకు చెందిన కొందరు ఆటగాళ్లు తొలి రెండు మ్యాచ్‌లకు అందుబాటులో ఉండకపోవచ్చు. ఆసీస్‌×కివీస్ మధ్య టీ20 సిరీస్‌ మార్చి 29న, ఇంగ్లాండ్‌×శ్రీలంక టెస్టు సిరీస్‌ మార్చి 31న ముగుస్తుంది. కానీ కొన్ని ఫ్రాంఛైజీలు ఏప్రిల్ 1న ఐపీఎల్‌ ప్రారంభించాలని నిర్వాహకులను కోరుతున్నాయి. స్టార్‌ ప్లేయర్లు ప్రారంభ మ్యాచ్‌ నుంచి ఉంటే సీజన్ ఎంతో ఉత్సాహంగా ఉంటుందని వారు భావిస్తున్నారు. అయితే వచ్చే సీజన్‌ షెడ్యూల్‌లో ఐపీఎల్ నిర్వాహకులు కొన్ని మార్పులు చేయాలనుకుంటున్నట్లు తెలుస్తోంది. వారంతపు రోజుల్లో రెండేసి మ్యాచ్‌లను నిర్వహించకుండా ఒక్క మ్యాచ్‌నే నిర్వహించాలని భావిస్తున్నట్లు సమాచారం. అంతకుముందు శని, ఆదివారాల్లో రెండేసి మ్యాచ్‌లు నిర్వహించేవారు. ఇటీవల జరిగిన ఐపీఎల్‌ వేలంలో ఆస్ట్రేలియా పేసర్ ప్యాట్‌ కమిన్స్‌ రికార్డు ధర (రూ.15.5 కోట్లు)కు అమ్ముడుపోయిన సంగతి తెలిసిందే. అతడ్ని కోల్‌కతా నైట్‌ రైడర్స్‌ సొంతం చేసుకుంది.

VIVO IPL 2020 SCHEDULE