వేసవిలో ఒంట్లో నీరు తగ్గి నిస్సత్తువ ఆవరిస్తుంది. అలాంటప్పుడు వాటర్‌మెలన్‌ తింటే ఒంటికి చల్లదనంతో పాటు శక్తి అందుతుంది. నీటితో నిండిన ఈ పండు ఆరోగ్యంతో పాటు అందాన్ని పెంచుతుంది. వర్కవుట్‌ తరువాత స్నాక్‌గా తింటే సత్వరమే శక్తి వస్తుంది. ఈ సీజన్‌లో తినదగ్గ పండ్లలో ఒకటైన పుచ్చకాయ వల్ల కలిగే లాభాలివి…
* వేసవిలో ఎండ తాపానికి ఒంట్లో కోల్పోయిన నీరు పుచ్చకాయ తినడంతో తిరిగి చేరుతుంది. దాంతో డీహైడ్రేషన్‌ సమస్య ఎదురవ్వదు.
* విటమిన్‌ ఎ ఎక్కువ మోతాదులో ఉన్నందున కంటికి ఎంతో మంచిది.
* దీనిలోని యాంటీ ఆక్సిడెంట్లు రోగనిరోధకశక్తిని పెంచి ఇన్‌ఫెక్షన్ల నుంచి రక్షణనిస్తాయి.
* సహజ చక్కెరలతో కూడిన వీటిలో కొలెస్ట్రాల్‌, కొవ్వు, క్యాలరీలు తక్కువ.
* పుచ్చకాయ తింటే చిగుళ్లు ఆరోగ్యంగా ఉంటాయి. జీర్ణవ్యవస్థ మెరుగ్గా పనిచేస్తుంది.
* వాటర్‌మెలన్‌లోని విటమిన్‌ సి గుండె కండరాలు గట్టిపడడాన్ని నిరోధిస్తుంది. ఫలితంగా రక్తపీడనం అదుపులో ఉంటుంది. గుండె ఆరోగ్యంగా ఉంటుంది.
* పుచ్చకాయలోని లైకోపిన్‌ అనే శక్తిమంతమైన యాంటీ ఆక్సిడెంట్‌ పురుషుల్లో ప్రొస్టేట్‌ కేన్సర్‌ ముప్పును తగ్గిస్తుంది.
* విటమిన్‌ బి1 ఎక్కువ మోతాదులో ఉండే వీటిని తింటే నాడీవ్యవస్థ చురుగ్గా పనిచేస్తుంది.
* టేబుల్‌ స్పూన్‌ చొప్పున పుచ్చకాయ రసం, యోగర్ట్‌ కలపి ముఖానికి రుద్దుకుంటే చర్మం తాజాదనాన్ని పొందుతుంది.
* వీటిలోని అరుదైన అమినో ఆమ్లం సిట్రుల్లిన్‌, అర్జినిన్‌లు రక్తప్రసరణ వ్యవస్థను మెరుగుపరుస్తాయి.
* వర్కవుట్‌ తరువాత స్నాక్‌గా వాటర్‌మెలన్‌ తింటే కండరాల అలసట తగ్గుతుంది. చెమట రూపంలో కోల్పోయిన మెగ్నీషియం, పొటాషియం తిరిగి చేరడంతో ఎనర్జీ నిండుతుంది.
* వాటర్‌మెలన్‌లోని బీటా-క్రిప్టోక్జాంతిన్‌ కీళ్లలో వాపును నివారిస్తుంది. రుమటాయిడ్‌ ఆర్థరైటిస్‌ వచ్చే అవకాశాల్ని తగ్గిస్తుంది.
