కళ్ల చుట్టూ నల్లని వలయాలున్నాయా? అయితే ఎక్కువగా టెన్షన్‌ పడకండి.. అందుబాటులో ఉండే.. తరచూ వంటకాల్లో వాడే టమాటాతోనే వలయాల్ని తొలగించుకోవచ్చు. ఇంకో విషయమండోరు.. కేవలం టమాటానే కాదు.. బంగాళదుంప, దోసకాయలతో కూడా తొలగించుకోవచ్చు. అది ఎలాగంటారా?
*టొమాటో – అలోవెరా :
అలోవెరా జెల్‌ యాంటీ ఇన్ఫ్లమేటరీ లక్షణాలను కలిగి ఉంటుంది. చర్మాన్ని రక్షిస్తుంది. కాబట్టి కంటి చుట్టూ ఎలాంటి నొప్పి, నల్లని వలయాలున్నా ప్రభావవంతంగా తొలగిస్తాయి. టేబల్‌ స్పూను టమాటా పేస్టు, టేబుల్‌ తాజా అలోవెరా జెల్‌ వేసి బాగా కలిపి ఈ మిశ్రమాన్ని కళ్ల చుట్టూ వేసి పదిహేను నిమిషాలు ఉంచాలి. ఆ తర్వాత చల్లటి నీటితో శుభ్రం చేసుకోవాలి. ఇలా చేస్తే నల్లని వలయాలు తొలగిపోతాయి. వారానికి ఒకటి లేదా రెండుసార్లు చేస్తే మంచిది.
*టమోటా – బంగాళాదుంపలు :
బంగాళాదుంపలోని ఎంజైమ్‌, కాటెకోలేస్‌ నల్ల మచ్చలను తగ్గించడానికి సహాయపడుతుంది. టమాటా గుజ్జు, బంగాళదుంప పేస్టు వేసి కలిపి కళ్ల చుట్టూ వేసుకోవాలి. బాగా ఆరిన తర్వాత చల్లటి నీటితో శుభ్రం చేసుకోవాలి. ఇలా రోజూ చేస్తే మంచి ఫలితం ఉంటుంది..
*టమోటా – దోసకాయ :
దోసకాయ చర్మాన్ని తేమగా ఉంచడానికి సహాయపడుతుంది. కళ్ళ చుట్టూ ఉన్న నల్లటి వలయాలను తొలగించడానికి సహాయపడుతుంది. టమాటా, దోసకాయ పేస్టు కలిపి కళ్ల చుట్టూ రాసుకుని పావు గంట తర్వాత నీటితో కడిగేయాలి. ఇలా వారానికి రెండుసార్లు చేసుకోవచ్చు.
