కథానాయకులు ప్రతి నాయక ఛాయలున్న పాత్రలు పోషించడం సాధారణమే. అదే హీరోయిన్లు పోషిస్తే, కాస్త ఆసక్తిగా అనిపిస్తుంది. ‘ఎవరు’లో రెజీనా అలాంటి పాత్రే పోషించి మెప్పించారు. ఇప్పుడు ఈ జాబితాలో మరో హీరోయిన్‌ రాబోతోంది. ఆమే అదితి రావ్‌ హైదరీ. నాని, సుధీర్‌ బాబు కథానాయకులుగా తెరకెక్కిన చిత్రం ‘వి’. మోహన్‌ కృష్ణ ఇంద్రగంటి దర్శకత్వం వహిస్తున్నారు. నివేదా థామస్, అదితి రావ్‌ హైదరీ నాయికలు. ఈ సినిమాలో నాని ప్రతినాయక ఛాయల్లో కనిపిస్తాడనే విషయం తెలిసిందే. తాజాగా మరో ఆసక్తికర విషయం బయటకు వచ్చింది. నానికి జంటగా నటిస్తున్న అదితి కూడా విలన్‌ పాత్ర పోషిస్తుందని సమాచారం.
