విశాఖ మన్యంలో కొందరు గిరిజనులు మూఢ నమ్మకాలను ఇంకా వీడటం లేదు. భూత వైద్యుడు చెప్పిన మాట విని.. నాలుగు నెలల పసిపాపకు తల్లి పాలు పట్టక గుక్కపట్టి ఏడ్చేలా చేసి చివరకు ఊపిరి పోయేందుకు కారణమయ్యారు. ఈ విషాదం విశాఖ జిల్లా జి.మాడుగుల మండలం కోరాపల్లి పంచాయతీ జాగేరు గ్రామంలో ఆలస్యంగా వెలుగుచూసింది. గ్రామానికి చెందిన ఓ మహిళకు రెండో కాన్పులో అమ్మాయి పుట్టింది. 4 నెలల తర్వాత చిన్నారి తల్లిదండ్రులు భూతవైద్యుణ్ని సంప్రదించారు. చిన్నారికి దోషం ఉందని, తల్లి మరణించే అవకాశాలున్నాయని, దోష నివారణగా పాపకు పాలు పట్టవద్దని అతడు సూచించాడు. ఆ మరుసటి రోజు నుంచి బిడ్డకు పాలు పట్టడం మానేశారు. సమీప బంధువు ఒకరు ఏడో రోజు ఇంటికి వచ్చి పాప పరిస్థితిని చూసి చలించి పాపను తీసుకెళ్లి మరో బాలింత వద్ద పాలు పట్టించేందుకు ప్రయత్నించారు. ఆ తల్లి దగ్గర పాలు తాగుతూనే చిన్నారి మృత్యుఒడికి చేరింది.
