విశ్వ మహమ్మారి కరోనా వైరస్‌ చాలా దేశాల్లో ఇంకా ఉద్ధృతంగానే వ్యాపిస్తోంది. తాజాగా 24 గంటల వ్యవధిలో అమెరికా, రష్యాల్లో తీవ్రంగా విరుచుకుపడింది. బ్రెజిల్‌, బ్రిటన్‌, సౌదీ అరేబియా, మెక్సికో, స్పెయిన్‌ తదితర దేశాల్లోనూ అధిక సంఖ్యలో కేసులు నమోదయ్యాయి. శనివారం నాటికి ప్రపంచ వ్యాప్తంగా నమోదైన కేసులు 46.70 లక్షలు మించిపోయాయి.
* అమెరికాలో 1,507,773 కేసులు నమోదు కాగా, 90113 మంది చనిపోయారు.
* రష్యాలో 9,200 కొత్త కేసులు వెలుగు చూడటంతో, శనివారం అక్కడ మొత్తం కేసుల సంఖ్య 2.72 లక్షల మార్కును దాటింది. మహమ్మారి కారణంగా ఇక్కడ 2,500కు పైగా మంది మృత్యువాత పడ్డారు.
* సింగపూర్‌లో కొత్తగా 465 మందికి వైరస్‌ సోకింది. దీంతో మొత్తం కేసుల సంఖ్య 27 వేల మార్కును దాటింది.
* ఇటలీలోని వెనిస్‌ నగరం పర్యాటకులకు మళ్లీ ఆహ్వానం పలుకుతోంది. మిలన్‌లో సోమవారం నుంచి వేల సంఖ్యలో హోటళ్లు, బార్లు, క్షౌరశాలలు, వస్త్ర దుకాణాలు తెరచుకోనున్నాయి.
* పాకిస్థాన్‌లో ఆంక్షలను సడలించిన క్రమంలో కరాచీ, లాహోర్‌, ఇస్లామాబాద్‌ మధ్య శనివారం దేశీయ విమాన సేవలు పాక్షికంగా ప్రారంభమయ్యాయి. 24 గంటల వ్యవధిలో 1,581 కేసులు నమోదు కావడంతో మొత్తం కేసులు 39 వేలకు చేరువయ్యాయి. ఇప్పటివరకూ ఈ దేశంలో 834 మంది వైరస్‌తో మృతిచెందారు.
* చైనాలో తాజాగా 21 మందికి వైరస్‌ సోకినట్టు నిర్ధారణ అయింది.
