బెంగళూరు స్పోర్ట్స్‌ అథారిటీ ఆఫ్‌ ఇండియా (SAI)లో పనిచేసే ఒక సీనియర్‌ వంట మనిషి కరోనాతో మృతిచెందటంతో సాయ్‌ శిక్షణా సంస్థ మూతపడింది. వివరాల్లోకి వెళితే… లాక్‌డౌన్‌ సడలింపుల్లో భాగంగా గత శుక్రవారం సాయ్‌లోని వంటశాలను తెరిచేందుకు అధికారులు సమావేశం నిర్వహించారు. ఈ సమావేశానికి వంటమనిషితోపాటు సుమారు 25 నుంచి 30 మంది అధికారులు హాజరైనట్లు సమాచారం. సమావేశానికి హాజరైనప్పుడు సదరు వంటమనిషి పూర్తి ఆరోగ్యంతో ఉన్నాడని సంబంధిత అధికారులు తెలిపారు. అనంతరం సోమవారం సదరు వ్యక్తి అనారోగ్యంతో ఆసుపత్రిలో చేరాడని… ఆ మరుసటిరోజే గుండెనొప్పితో మృతి చెందినట్లు వారు పేర్కొన్నారు. అయితే, మృతదేహానికి నిర్వహించిన వైద్య పరీక్షల్లో కొవిడ్‌ పాజిటివ్‌ నిర్ధారణ అయిందని అధికారులు తెలిపారు. ఈ సమావేశం అనంతరం భారతీయ మహళా హాకీ జట్టు కూడా అదే హాలులో సమావేశమయ్యింది. కాగా, సమావేశానికి హాజరైన అధికారులు, ఇతర సిబ్బందిని క్వారంటైన్‌కు పంపించారు.
