పశువుల్లో ఆరోగ్యంతో పాటు పునరుత్పత్తి సామర్థ్యాన్ని పెంపొందించడానికి, జీవరసాల (హార్మోన్స్‌) ఉత్పత్తికి ఖనిజ లవణాలు ఎంతో అవసరమని హాలహర్వి మండల పశువైద్యాధికారి అశోక్‌ తెలిపారు. ఇవి లోపిస్తే.. పశువుల్లో ఎదుగుదల, జీర్ణప్రక్రియ, పునరుత్పత్తి సమస్యలు వస్తాయి.
ముఖ్యమైన ఖనిజ లవణాలు : కాల్షియం, ఫాస్ఫరస్‌, సోడియం, పొటాషియం, కాపర్‌, కోబాల్ట్‌, మెగ్నీషియం, క్లోరిన్‌, ఐరన్‌
***అందించాల్సిన మోతాదు
ఖనిజ లవణాన్ని రోజుకు ఒకసారి దూడలకు 5-20 గ్రా., పెయ్య దూడలకు 20-30 గ్రా., పాలిచ్చే పశువులకు 50-60 గ్రా. చొప్పున దాణాతో కలిపి పెట్టాలి. ఈ ఖనిజలవణ మిశ్రమం మార్కెట్లో వివిధ పేర్లతో దొరుకుతుంది.
***ప్రయోజనాలు
* దూడల్లో రోగ నిరోధకశక్తి పెరిగి,ఆరోగ్యంగా ఉంటాయి.
* సకాలంలో ఎదకు వస్తాయి.
* పునరుత్పత్తి ప్రక్రియ సక్రమంగా ఉంటుంది.
* పాల దిగుబడి పెరుగుతుంది.
* ఈనిన పశువుల్లో మాయ దిగడం, పాల జ్వరం వంటి సమస్యలు తలెత్తవు.
* పశువులు బట్టలు, మట్టి, కాగితాలు తినడం, మూత్రం తాగడం వంటి దురలవాట్లకు దూరంగా ఉంటాయి.
* చర్మం నిగనిగలాడుతూ, పశువులు ఆరోగ్యంగా కనిపిస్తాయి.
