పుస్తకాలు, సరకులు, మహిళల కోసం మార్కెట్లో ఎన్నో రకాల బ్యాగులు అందుబాటులో ఉన్నాయి. మోసుకెళ్లే వస్తువును బట్టి వివిధ ఆకృతుల్లో.. అనేక రంగుల్లో బ్యాగులు మార్కెట్లోకి వస్తుంటాయి. కానీ పుచ్చకాయ కోసం ప్రత్యేకంగా తయారు చేసిన బ్యాగ్‌ను ఎప్పుడైనా చూశారా? జపాన్‌కు చెందిన బ్యాగ్స్‌ డిజైనర్‌ సుషియా కాబన్‌ దీన్ని రూపొందించారు. యూసుకె కడొయ్‌ అనే క్రాఫ్ట్‌మెన్‌తో కలిసి ‘ది ఫన్‌ ఆఫ్ క్యారియంగ్‌’ పేరుతో ఓ కార్యక్రమం చేపట్టారు. ఇందులో భాగంగా ఒక్క వస్తువునే మోసుకెళ్లే విధంగా బ్యాగ్‌ను రూపొందించాలని నిర్ణయించారు. ఈ క్రమంలో ఒక్క పుచ్చకాయ మాత్రమే పట్టే బ్యాగ్‌ను తయారు చేశారు. కడొయ్‌కి పుచ్చకాయలంటే చాలా ఇష్టమట. అందుకే దీనిని తయారు చేసినట్లు చెబుతున్నారు. ఈ బ్యాగ్‌ కోసం ఇటలీ నుంచి తెప్పించిన లగ్జరీ లెదర్‌ను వాడరట. అయితే దీనికి మార్కెట్లో అమ్మకానికి పెట్టట్లేదు. కేవలం టోక్యోలోని షుబుయా, రొప్పొంగి ప్రాంతాల్లో ఉన్న సుషియా కాబన్‌కి చెందిన స్టోర్స్‌లో డిస్‌ప్లేగా పెడతారట. కొనలేకున్నా.. ఈ బ్యాగ్‌ను ఎలా తయారు చేశారో ఈ వీడియోలో చూసేయండి..!
