మగువ సహజంగానే అలంకార ప్రియురాలు. ప్రకృతిలోని ప్రతి అందమైన వస్తువూ తన సొంతం కావాలని కోరుకుంటుంది. చెట్లకు పూసే పూలూ, నీటిలో దొరికే గవ్వలూ, మట్టిలో లభించే వజ్రాలూ! ఒకటేమిటి, ఏ కొంత మెరుపు కనిపించినా ఆమెలో తెలియని మైమరపు! పురాణాల్లో పారిజాతాపహరణ ఘట్టం అలా పుట్టిందే. దేవలోక పుష్పాన్ని శ్రీకృష్ణుడి దేవేరి సత్యాదేవి కోరుకోవడంతో దేవేంద్రుడితో యుద్ధమే జరిగింది. ఇక, నగలైతే ప్రాణమే ఇచ్చేస్తుంది మహిళ.
*అందానికి, హుందాతనానికి పెట్టింది పేరు.. కాసుల పేరు! కాసుల్ని పేర్చడం వల్ల ఆ పేరు వచ్చి ఉండవచ్చు. బంగారపు కాసులు మారకద్రవ్యంగా చలామణి అయిన రోజుల్లో.. వాటిని చక్కగా పేర్చి అలంకరించుకునేది ఇల్లాలు. అలా కాసుల పేరు ఓ ఆభరణమైంది. నేటికీ ఇల్లాలి నగల డబ్బాలో కాసుల పేరు ఉండటం ఓ గొప్ప. లక్ష్మీదేవి, రామపరివారం.. దేవీ దేవతల రూపాలతో కాసుల పేరులోని కాసులను రూపొందించడం సంప్రదాయం.
*లక్ష్మీ కాసుల మాల
శుభానికి, సౌభాగ్యానికి లక్ష్మీదేవి అధిదేవత. విద్యాలక్ష్మి, ధనలక్ష్మి, సంతాన లక్ష్మి, విజయ లక్ష్మి.. ఇలా అష్టలక్ష్మీ రూపాలతో అలరారేదే లక్ష్మీ కాసులమాల! నగధగల మధ్య ఆ యువతి సాక్షాత్తు సిరిలక్ష్మి.
*రామ పరివార కాసులమాల
ఈ మాలలో ప్రతి కాసుపైనా శ్రీరాముడి పట్టాభిషేక ఘట్టం ఉంటుంది. సీతాలక్ష్మణ సమేతుడై రామచంద్రుడు దర్శనమిస్తాడు. కొన్ని డిజైన్లలో సాధారణ కాసుల మధ్యలో రామపరివారపు లాకెట్‌ ఉంటుంది.
*రత్నాల కాసుల పేరు
పేరుకు కాసుల పేరే అయినా.. ఈ హారంలో కాసులు తక్కువే. వజ్రాలూ, పచ్చలూ కెంపులూ మొదలైన జాతిరాళ్లు విరివిగా వాడతారు.
*‘షార్ట్‌’ కాసుల హారం
మొదట్లో కాసులమాల చాలా పొడుగ్గా ఉండేది. కాలక్రమేణా అభిరుచులతో పాటు డిజైన్లు కూడా మారాయి. అలా కురచ కాసుల పేరులు వచ్చాయి. అందులోని, కాసులూ చిన్నవైపోయాయి.
*డిజైనర్‌ కాసుల పేరు
కాసుల పేరులో.. దేవతామూర్తులు కాకుండా పూలూ, పండ్లూ, లతలూ.. ఇలా నచ్చిన డిజైన్లను జోడించుకుంటున్నారు చాలామంది. సృజనకు హద్దేం ఉంటుందీ!
*వడ్డాణంలా కూడా
కొత్తగా వస్తున్న కాసుల పేరును వడ్డాణంలా, నెక్లెస్‌లా వాడుకోవచ్చు. అలా డిజైన్‌ చేస్తున్నారు. కాసుల పేరు డిజైన్‌తోనే లోలాకులు, ముక్కెరలు, గాజులు కూడా వస్తున్నాయి. ఏ సందర్భానికి అయినా కాసుల పేర్లు అతికినట్టు సరిపోతాయి.
*లేయర్డ్‌ కాసుల పేరు
ఈ డిజైన్లు మెడ భాగంలో చిన్న సైజు చైన్‌లా వచ్చి.. అక్కడి నుండి రెండుమూడు పొరలుగా హారం ఉంటుంది. ఆ హారానికి చిన్నచిన్న కాసులు ఉంటాయి. మధ్యలో పెండెంట్‌ కూడా ఉంటుంది.
