గత 8ఏళ్లల్లో తానా ఫౌండేషన్‌తో పాటు తానా ద్వారా చేసిన ఎన్నో విజయవంతమైన, ప్రభావంతమైన సేవా కార్యక్రమాలే తమ విజయానికి ముందుబాట పరుస్తాయని తానా 2021 అధ్యక్ష అభ్యర్థి ఎన్నికల్లో బరిలో ఉన్న నిరంజన్ శృంగవరపు శుక్రవారం సాయంత్రం నార్త్ కరోలినా పర్యటనలో అన్నారు. తమ ఆధ్వర్యంలో నిర్వహించిన కార్యక్రమాలు, చేయబోయే కార్యక్రమాలను ఆయన సభికులకు వివరించి తమ విజయానికి తోడ్పడాలని విజ్ఞప్తి చేశారు. తానాలో ప్రతి పైసాకు, పనికి జవాబుదారీతనం ఉండాలనే ఉద్దేశానికి #TANA4CHANGE నినాదం అభివ్యక్తి అని ఆయన పేర్కొన్నారు. ఈ వారం ఓ ప్రముఖ టీవీ ఛానెల్‌లో తాను చేసిన వ్యాఖ్యలను వక్రీకరించారని, ఒక రాజకీయ పార్టీకి వ్యక్తిగత అభిమానం ఉండటం నేరం కాదని, కానీ తానాకు ఒక పార్టీని అంటగట్టడం తప్పు అనేది తన భావనగా మాత్రమే చెప్పానని ఆయన వివరణ ఇచ్చారు. ఈ కార్యక్రమంలో నిరంజన్ ప్యానెల్ నుండి కొల్లా అశోక్‌బాబు, కసుకుర్తి రాజా, వేమూరి సతీష్, తాళ్లూరి మురళీ, గోగినేని కిరణ, శశాంక్ యార్లగడ్డ, రామిశెట్టి సుమంత్, గుదె పురుషోత్తమ చౌదరి, తూనుగుంట్ల శిరీష, కటికి ఉమా, వడ్లమూడి హితేష్, ఓరుగంటి శ్రీనివాస్, నిమ్మలపూడి జనార్ధన్, తానా తదుపరి అధ్యక్షుడు లావు అంజయ్య చౌదరి తదితరులు పాల్గొన్నారు. అప్పలాచియన్ ప్రాంతీయ ప్రతినిధి సురేష్ కాకర్ల, తానా రాలే స్థానిక బృందం ఈ కార్యక్రమానికి సమన్వయకర్తలుగా వ్యవహరించారు.
