తానా 2021 అధ్యక్ష ఎన్నికల ప్రచారం కాలిఫోర్నియాలో జోరుగా సాగింది. అధ్యక్ష అభ్యర్థి నిరంజన్ శృంగవరపు ప్యానెల్ శుక్ర, శనివారాల్లో శాక్రిమెంటో, ఫోల్సొం, శాన్‌హోసే, శాన్‌రామోన్ ప్రాంతాల్లో ప్రవాసులను కలుసుకుని తమ ఎన్నికల వాణిని గట్టిగా వినిపించారు. శనివారం నాడు శాన్‌రామోన్‌లోని ఈస్ట్ బ్రాంచ్ పార్క్ వద్ద పర్వతశ్రేణుల మధ్య ప్రకృతి ఒడిలో ఉత్సాహంగా సాగిన ప్రచార కార్యక్రమంలో నిరంజన్ మాట్లాడుతూ….సంస్థ భవిత కోసం తాము పోరాడుతున్నామని, మార్పు అంటే పారదర్శకంగా ప్రజాస్వామ్యానికి పట్టం కట్టడం తప్ప నాలుగు గోడల మధ్య సీల్డ్ కవర్లో ఎన్నుకోవడం కాదన్నారు. బే-ఏరియాలో తానాకు ఉన్న బలం, ఆ ప్రాంతంతో ఉన్న అనుబంధం అమూల్యమైనదని, రోటీన్‌కు భిన్నంగా పచ్చికబయళ్లల్లో ప్రచారంలో పాల్గొనడం ఆనందంగా ఉందన్నారు. తమ ఓట్లతో తానా ఓటర్లు మార్పు తీర్పుకు పట్టం కట్టాలని కోరారు. ఈ సమావేశంలో ఆయన ప్యానెల్ సభ్యులు కొల్లా అశోక్‌బాబు, యార్లగడ్డ శశాంక్, ఓరుగంటి శ్రీనివాస్, గుదే పురుషోత్తమ చౌదరి, డా.కటికి ఉమా, తాళ్లూరి మురళీ, వేమూరి సతీష్, రాజా కసుకుర్తి, నిమ్మలపూడి జనార్ధన్, లావు అంజయ్య చౌదరి తదితరులు పాల్గొన్నారు.
################
