జింబాబ్వే మాజీ కెప్టెన్‌, కోచ్‌ హీత్ స్ట్రీక్‌పై అన్ని ఫార్మాట్ల క్రికెట్‌లో ఎనిమిదేళ్ల నిషేధం విధిస్తున్నట్లు ఐసీసీ ప్రకటించింది. ఐసీసీ అవినీతి నిరోధక కోడ్‌ను హీత్ ఉ‌ల్లంఘించినందుకు ఈ నిర్ణయం తీసుకున్నట్లు ఆ సంస్థ వెల్లడించింది. హీత్ స్ట్రీక్‌ 2016 నుంచి 2018 వరకు జింబాంబ్వేకు, ఇతర దేశవాళీ లీగ్‌లలో జట్లకు కోచ్‌గా పనిచేశాడు. ఆ సమయంలో జరిగిన మ్యాచు‌ల్లోని అంతర్గత సమాచారం బుకీలకు చేరవేయడం, ఆటగాళ్లకు బుకీలను పరిచయం చేశాడనే పలు ఆరోపణలు అతనిపై ఉన్నాయి. ఈ నేపథ్యంలో అతనిపై జరిగిన విచారణకు ఆటంకం కలిగించేలా వ్యవహరించాడనే ఆరోపణలు సైతం వచ్చాయి. ఐసీసీ తీసుకున్న నిర్ణయాన్ని అతడు అంగీకరించాడు. చేసిన తప్పునకు పశ్చాత్తాప పడుతున్నట్లు తెలియజేశాడు. హీత్ స్ట్రీక్‌పై విధించిన నిషేధం 28 మార్చి 2029న తొలగిపోనుంది.
