తానా 2021 ఎన్నికల్లో రాజకీయం రోజురోజుకీ వేడెక్కుతోంది. ప్రతిరోజు ఒకరిపై ఒకరి సవాళ్లు-ప్రతిసవాళ్లతో సై అంటే సై అంటున్నారు. ఈ నేపథ్యంలో తానా ఫౌండేషన్ ట్రస్టీగా డానర్స్ కోటా నుండి పోటీ చేస్తున్న విద్యా గారపాటి ప్రస్తుతం అధ్యక్ష పదవికి పోటీ చేస్తున్న నిరంజన్ శృంగవరపుకి సవాల్ విసిరారు. గతంలో వాషింగ్టన్ డీసీలో జరిగిన తానా సభల్లో కపిల్‌దేవ్ చేతుల మీదుగా అందించిన బ్యాట్‌ను వేలంలో $25001కు పాడుకున్న గారపాటి ఆ సొమ్మును చెల్లించలేదని తానా బోర్డు అల్టిమేటం ఇచ్చింది. సదరు సొమ్మును చెల్లించకపోతే ఎన్నికల్లో ఆయనకు పోలైన ఓట్లను లెక్కించకుండా అడ్డుకుంటామని హెచ్చరించింది. ఈ క్రమంలో బుధవారం నాడు విద్యా తానా ఫౌండేషన్‌కు $25001 చెల్లించి నిరంజన్ కూడా తన సవాల్ స్వీకరించాలని ఆయన డిమాండ్ చేశారు. గతంలో తానా ఫౌండేషన్‌కు లక్ష డాలర్లు విరాళం ఇస్తున్నట్లు ప్రకటించారని, ఆ విరాళం ఎప్పుడు ఎక్కడ ఇచ్చారు ఎలా ఖర్చు చేశారో ఆధారాలతో కూడిన వివరాలను బహిర్గతం చేయాలని విద్యా డిమాండ్ చేశారు. శృంగవరపు తానా ఫౌండేషన్‌కు లక్ష డాలర్లు చెల్లించినట్లు నిరూపిస్తే తాను కూడా లక్ష డాలర్లు విరాళంగా ఇస్తానని సవాల్ విసిరారు. దీనికి నిరంజన్ ఎలా స్పందిస్తారో వేచి చూడాల్సిందే….
##########
