బుల్లితెర ప్రభావం ఎంతగా పెరిగిందంటే ఇక్కడ పేరున్న వాళ్లంతా వెండితెరపై అడుగుపెడుతుంటారు. అందం, ప్రతిభ గల నాయికలకు ఇలాంటి అవకాశాలు అతి త్వరగా వచ్చేస్తుంటాయి. ‘బిగ్‌బాస్‌ 13’ కార్యక్రమం ద్వారా టీవీ వీక్షకుల్లో దేశవ్యాప్తంగా పేరు తెచ్చుకుంది షెహనాజ్‌ గిల్‌. ఈ గుర్తింపు ఆమెను బాలీవుడ్‌ హీరోయిన్‌ను చేసేసింది. సల్మాన్‌ ఖాన్‌ నటిస్తున్న ‘కభీ ఈద్‌ కభీ దివాలీ’ చిత్రంలో కీలక పాత్రకు ఎంపికైందీ తార. పూజా హెగ్డే ఈ సినిమాలో నాయికగా నటిస్తున్నది. తాజాగా ఆమెకు మరో ఇంట్రెస్టింగ్‌ ప్రాజెక్ట్‌ దక్కినట్లు సమాచారం. ‘వీర్‌ దే వెడ్డింగ్‌’ నిర్మాత రియా కపూర్‌ కొత్త సినిమాలో షెహనాజ్‌ గిల్‌ నాయికగా ఎంపికైంది. ఈ చిత్రంలో అనిల్‌ కపూర్‌, భూమి ఫెడ్నేకర్‌ కీలక పాత్రలు పోషిస్తున్నారు. ఈ చిత్రానికి రియా కపూర్‌ భర్త కరణ్‌ భూలానీ దర్శకత్వం వహిస్తున్నారు. యువతీ యువకుల మధ్య ఆధునిక సంబంధాల నేపథ్యంతో ఈ సినిమా సాగనుంది. ఆగస్టు నుంచి ఈ సినిమా సెట్స్‌ మీదకు వెళ్లనున్నట్లు తెలుస్తున్నది.
