అభిమానం ఎంత పనైనా చేయిస్తుంది అంటారు. అందులోనూ తమ అభిమాన వ్యక్తులు, నటీనటులను చూస్తే ఫ్యాన్స్ ఏం చేస్తారో కూడా కొన్నిసార్లు ఊహించలేం. ప్రాణాలను సైతం లెక్క చేయకుండా తమ అభిమాన నటులను కలిసేందుకు ప్రయత్నిస్తారు.
తాజాగా శ్రీ సత్యసాయి జిల్లా హిందూపురంలో ఇలాంటి ఘటనే జరిగింది. సినీ నటుడు, ఎమ్మెల్యే నందమూరి బాలకృష్ణను కలిసేందుకు ఓ అభిమాని ఏకంగా నదిలో దూకేశాడు. ఇందుకు సంబంధించిన వీడియో సోషల్ మీడియాలో వైరల్ అవుతోంది.
అసలేం జరిగిందంటే
గత కొన్ని రోజులుగా కురుస్తున్న వర్షాలకు రాయలసీమలో పలు వాగులు, వంకలు పొంగిపొర్లుతున్నాయి. శ్రీ సత్యసాయి జిల్లాలోనూ కురిసిన భారీ వర్షాలకు వరద ఉధృతి పెరిగి కొన్నిచోట్ల లోతట్లు ప్రాంతాలు జలమయం అయ్యాయి. చెరువు కట్టలు, చిన్న చిన్న వాగులు తెగిపోయి గ్రామాలకు రాకపోకలు నిలిచిపోయాయి. ఈ క్రమంలో ఎమ్మెల్యే బాలకృష్ణ హిందూపురం మండలం పోచనపల్లి వద్ద తెగిపోయిన వంతెనను పరిశీలించడానికి వెళ్లారు. ఆయన వంతెనను పరిశీలిస్తున్న సమయంలో తెగిపోయిన వంతెన అవతలిపైపు ఉన్న ఓ అభిమాని ఎలాగైనా బాలయ్యను కలుసుకోవాలనుకున్నాడు.
నదిలో దూకిన అభిమానం
