యునైటెడ్ అరబ్ ఎమిరేట్స్ ప్రభుత్వం విదేశీయులకు దీర్ఘకాలిక రెసిడెన్సీ కోసం గోల్డెన్ వీసాలు ఇస్తున్న విషయం తెలిసిందే. ఐదు, పదేళ్ల కాలపరిమితితో ఈ వీసాలను జారీ చేస్తోంది. దీనికోసం 2019లో ఓ ప్రత్యేక వ్యవస్థను యూఏఈ ఏర్పాటు చేసింది. ఈ నేపథ్యంలో జనరల్ డైరెక్టరేట్ ఆఫ్ రెసిడెన్సీ అండ్ ఫారినర్స్ అఫైర్స్ (GDRFA) కేవలం దుబాయ్ పరిధిలోనే 2019 నుంచి ఇప్పటివరకు జారీ అయిన గోల్డెన్ వీసాల వివరాలను వెల్లడించింది. ఈ మూడేళ్లలో సుమారు 1,51,666 గోల్డెన్ వీసాలు మంజూరు అయ్యాయని జీడీఆర్ఎఫ్ఏ వెల్లడించింది. అలాగే 2022 ఏడాదికి సంబంధించి ఇప్పటివరకు 1,55,42,384 ఎంట్రీ, రెసిడెన్సీ పర్మిట్లను జారీ చేసినట్లు తెలిపింది. 2020-21తో పోలిస్తే ఈ ఏడాది 43శాతం మేర విదేశీ ఉద్యోగుల సంఖ్య పెరిగిందని జీడీఆర్ఎఫ్ఏ తన వార్షిక నివేదికలో పేర్కొంది.
ఇక వీసా ప్రక్రియను వేగవంతం చేయడానికి ఈ మధ్య కాలంలో అనేక వినూత్న కార్యక్రమాలు ప్రారంభించడం జరిగిందని తెలిపింది. జీడీఆర్ఎఫ్ఏ ద్వారా 96 శాతం మంది వినియోగదారులకు సేవలు అందుబాటులో ఉన్నాయని దుబాయ్ చీఫ్ లెఫ్టినెంట్ జనరల్ ముహమ్మద్ అహ్మద్ అల్ మర్రి అన్నారు. ఈ సందర్భంగా రెసిడెంట్ వీసా విభాగానికి సంబంధించి వార్షిక నివేదికను ఆయన పరిశీలించారు. ఈ డిపార్ట్‌మెంట్ ఉద్యోగుల అద్భుతమైన పనితీరు కారణంగానే మంచి ఫలితాలను సాధించగలిగామని ఆయన పేర్కొన్నారు. ఇక భారత్ నుంచి కూడా యూఏఈ ఇచ్చే ఈ గోల్డెన్ వీసాలు పొందుతున్న వారి సంఖ్య క్రమంగా పెరుగుతోంది. ఇప్పటికే పలువురు బాలీవుడ్, మలయాళ స్టార్స్‌తో పాటు ఇతరులకు కూడా వీసాలు దక్కాయి.
