శ్రీశైలం: శ్రీశైల మహాక్షేత్రంలో ఈ నెల 11 నుంచి 21వ తేదీ వరకు జరిగే మహా శివరాత్రి బ్రహ్మోత్సవాలకు అన్ని ఏర్పాట్లు చేస్తున్నట్లు ఆలయ కార్యనిర్వహణాఽధికారి ఎస్‌.లవన్న తెలిపారు. మంగళవారం పరిపాలన భవనంలోని సమావేశమందిరంలో జరిగిన సమావేశంలో ఆయన మాట్లాడుతూ భక్తుల సౌకర్యాల కల్పనకై దేవస్థానం విస్తృత ఏర్పాట్లు చేస్తున్నామన్నారు. పాదయాత్రగా వచ్చే భక్తులకు వెంకటాపురం, నాగలూటి, పెద్దచెరువు, భీమునికొలను మెట్లమార్గం, కైలాసద్వారం, హటకేశ్వరం, సాక్షిగణపతి ప్రాంతాలతో పాటు క్షేత్ర పరిధిలో మంచినీటి సదుపాయం, మెడికల్‌ క్యాంప్‌లు, బయలు ప్రదేశాలలో చలువ పందిళ్లు ఏర్పాటు చేయనున్నట్లు తెలిపారు. పెద్దసత్రం వద్ద సామాన్లు భద్రపరచుకునే గదులను ఏర్పాట చేశామన్నారు. స్నానపు గదులు, శౌచాలయాలను, తాత్కాలిక మరుగుదొడ్లను ఏర్పాటు చేశామన్నారు. భక్తులకు నాలుగు క్యూలైన్ల ద్వారా ఉచిత దర్శనం, (రూ.200కు శ్రీఘ్రదర్శనం, రూ.500 కు అతిశ్రీఘ్రదర్శనం, కంకణాలు ధరించిన పాదయాత్ర భక్తులకు ప్రత్యేక క్యూలైన్‌ ద్వారా దర్శనం కల్పిస్తామని ఆయన తెలిపారు. భక్తుల కోసం 30 లక్షల లడ్డూ ప్రసాదాలను అందుబాటులో ఉంచుతామన్నారు.
