గుజరాత్ కెప్టెన్ హార్దిక్ పాండ్య అంచనానే నిజమైంది. లక్నో పిచ్ మ్యాచ్ జరిగేకొద్దీ స్లో అవుతుందని టాస్ టైమ్‌లోనే ఊహించిన హార్దిక్ పాండ్య ఫస్ట్ బ్యాటింగ్ చేసేందుకు మొగ్గు చూపాడు. అయితే కేవలం 136 పరుగుల లక్ష్యాన్నే లక్నో ముందు గుజరాత్ నిలపగలిగింది. కానీ.. చివర్లో అద్భుతంగా బౌలింగ్ చేసిన మోహిత్ శర్మ 4 పరుగులే ఇవ్వగా.. నాలుగు వికెట్లని చేజార్చుకున్న లక్నో మూల్యం చెల్లించుకుంది. సీజన్‌లో గుజరాత్‌కి ఇది నాలుగో గెలుపు.
* గెలిచే మ్యాచ్‌ని లాస్ట్‌లో చేజార్చుకున్న లక్నో
* చివరి 5 ఓవర్లలో గుజరాత్ బౌలర్లు మ్యాజిక్
* కొంపముంచిన లక్నో కెప్టెన్ రాహుల్ స్లో బ్యాటింగ్
* చివరి ఓవర్‌లో 4 వికెట్లు చేజార్చుకున్న లక్నో
ఐపీఎల్ 2023 (IPL 2023) సీజన్‌లో గుజరాత్ టైటాన్స్ (Gujarat Titans) ఊహించనిరీతిలో విజయాన్ని అందుకుంది. లక్నో సూపర్ జెయింట్స్(Lucknow Super Giants)తో లక్నో వేదికగా శనివారం జరిగిన మ్యాచ్‌లో కేవలం 136 పరుగుల లక్ష్యాన్ని అద్భుతరీతిలో కాపాడుకున్న గుజరాత్ టైటాన్స్ 7 పరుగుల తేడాతో గెలుపొందింది. చివరి ఓవర్‌లో లక్నో విజయానికి 12 పరుగులు అవసరంకాగా.. మోహిత్ శర్మ వేసిన లాస్ట్ ఓవర్‌లో రెండో బంతికి కేఎల్ రాహుల్, మూడో బంతికి స్టాయినిస్ ఔటైపోగా.. నాలుగో బంతికి బదోని, ఐదో బంతికి దీపక్ హుడా రనౌట్‌గా వెనుదిరిగారు. దాంతో ఓవరాల్‌గా లాస్ట్ ఓవర్‌లో లక్నో 2,W, W, W1, W1, 0 రూపంలో 4 పరుగులే చేయగలిగింది. సీజన్‌లో ఆరో మ్యాచ్ ఆడిన గుజరాత్‌కి ఇది నాలుగో గెలుపుకాగా.. ఏడో మ్యాచ్ ఆడిన లక్నోకి ఇది మూడో ఓటమి.
*136 పరుగుల లక్ష్యఛేదనలో లక్నో సూపర్ జెయింట్స్ కెప్టెన్ కేఎల్ రాహుల్ (68: 61 బంతుల్లో 8×4) హాఫ్ సెంచరీ బాదాడు. అతనికి ఓపెనర్ కైల్ మేయర్స్ (24: 19 బంతుల్లో 2×4, 1×6), బ్యాటింగ్ ఆర్డర్‌లో కాస్త ముందుకు వచ్చిన కృనాల్ పాండ్య (23: 23 బంతుల్లో 2×4, 1×6) చక్కటి సహకారం అందించారు. దాంతో 14.3 ఓవర్లు ముగిసే సమయానికి లక్నో టీమ్ 106/2తో నిలిచి అలవోకగా గెలిచేలా కనిపించింది. కానీ.. ఇక్కడి నుంచే గుజరాత్ బౌలర్లు కట్టుదిట్టంగా బంతులేస్తూ వచ్చారు. దాంతో కేఎల్ రాహుల్ కనీసం స్ట్రైక్ కూడా రొటేట్ చేయలేకపోయాడు. అలానే నికోలస్ పూరన్ (1: 7 బంతుల్లో) కూడా పరుగులు రాకపోవడంతో సిక్స్ కోసం వెళ్లి మూల్యం చెల్లించుకున్నాడు. చివరి ఓవర్‌లో బదోని (8), స్టాయినిస్ (0), దీపక్ హుడా (2)తో పాటు కెప్టెన్ కేఎల్ రాహుల్ కూడా ఒత్తిడికి గురై తొందరపడ్డారు. దాంతో గెలిచే మ్యాచ్‌ని చేజేతులా లక్నో టీమ్ చేజార్చుకుంది.
అంతకముందు హార్దిక్ పాండ్య (66: 50 బంతుల్లో 2×4, 4×6) అర్ధ శతకం బాదడంతో మ్యాచ్‌లో టాస్ గెలిచి మొదట బ్యాటింగ్ చేసిన గుజరాత్ టైటాన్స్ టీమ్ 6 వికెట్ల నష్టానికి 135 పరుగులు చేసింది. కెప్టెన్ హార్దిక్‌తో పాటు వికెట్ కీపర్ వృద్ధిమాన్ సాహా (47: 37 బంతుల్లో 6×4) చెప్పుకోదగ్గ స్కోరు చేశాడు. లక్నో సూపర్ జెయింట్స్ బౌలర్లలో స్టాయినిస్, కృనాల్ రెండేసి వికెట్లు, మిశ్రా, నవీన్ ఉల్ హక్ చెరో వికెట్ తీశారు.
