నిరుద్యోగిగా ఉన్నపుడు ఏ జాబ్ వచ్చినా చేయాలి అని ఉంటుంది. తీరా ఉద్యోగం వచ్చాక అందులో ఉద్యోగ సంతృప్తి ఉండదు. ఏదో కాలం వెళ్తోందా అంటే వెళ్తోంది అన్నట్లు గడపుతూ ఉంటాం. ఇక కార్పొరేట్ ఆఫీసులో గంటల తరబడి ఏసీల కింద కూర్చొని.. ముందు ఉన్న కంప్యూటర్‌లో తలదూర్చి.. ఉదయమో, సాయంత్రమో, రాత్రి అయిందో తెలియక పనిచేసేవారిని చాలా మందిని చూస్తూనే ఉన్నాం. మనలో చాలా మంది అలాంటి ఉద్యోగాలనే చేస్తూ ఉన్నాం. దీంతో 40 ఏళ్లలోనే 60 ఏళ్ల ముసలి వాళ్లలా మారిపోతున్నాం. బద్దకం, బీపీలు, షుగర్లు ఇలా లెక్కపెట్టుకుంటూ పోతే ఆస్పత్రి బోర్డుపై ఉండే రోగాలన్నీ మన శరీరంలోకే చేరుతున్నాయి. మెదడుతో చేస్తున్నంత పనిలో 10 శాతం కూడా శారీరకంగా చేయకపోవడంతో అధిక బరువు, ఊబకాయం వంటి జబ్బులు పలకరిస్తూనే ఉన్నాయి. కానీ వారు మాత్రం అలాగే ఉండిపోలేదు. లక్షలు జీతం వచ్చే వైట్ కాలర్ ఉద్యోగాలను కూడా పక్కన పెట్టేసి.. తమకు ఇష్టం వచ్చిన పని చేసుకుంటూ.. మనసుకు ప్రశాంతతతో బతుకుతున్నారు. వాళ్లే చైనా యువత.
చైనాలో యువత సరికొత్త వైపు అడుగులు వేస్తున్నారు. ఏసీల కింద కూర్చొని చేసే వైట్ కాలర్ జాబ్‌లను విడిచి పెట్టి.. చెఫ్‌లు, వెయిటర్లు, క్లీనర్లుగా మారుతున్నారు. గత ఏడాది నుంచి ఇదే ట్రెండ్ కనిపిస్తోందని వార్తా కథనాలు చెబుతున్నాయి. ఏసీల్లో కదలకుండా కుర్చీలో కూర్చొని లక్షలు వచ్చే జాబ్‌లను వదిలేసి.. శరీరాలకు ఎక్సర్‌సైజ్‌ను ఇచ్చే ఉద్యోగాల్లో చేరుతున్నారు. ఇలా జాబ్‌లను వదిలేసి చేస్తున్న వేరే ఉద్యోగాల్లో మానసిక సంతృప్తి దొరుకుతుందని చెబుతున్నారు.
గాంగ్‌డాంగ్ ప్రావిన్స్‌లో బైట్డ్యాన్స్ సంస్థలో ఓ యువతి పనిచేసేది. అయితే అందులో ఉద్యోగం మానేసి ప్రస్తుతం సొంతంగా ఓ ఫాస్ట్‌ఫుడ్ సెంటర్‌ను తెరిచింది. అందులో ఆమె వంట చేయడమే కాకుండా.. క్యాష్ కౌంటర్‌ను కూడా మెయింటైన్ చేస్తోంది. ఇలా రోజుకు 140 డాలర్లు అంటే మన కరెన్సీలో రూ. 1100 నుంచి 1200 వరకు సంపాదిస్తోంది. బైట్డ్యాన్స్ సంస్థలో చేసే ఉద్యోగాన్ని వీడిన తర్వాత చాలా సంతోషంగా ఉన్నానని చెబుతోంది. తాను చేసే కొత్త ఉద్యోగం వల్ల శరీరం అలసిపోయినా.. మనసు మాత్రం చాలా ప్రశాంతంగా ఉంటోందని సోషల్ మీడియాలో వెల్లడించింది. దానికి My First Physical Work Experience అనే హ్యాష్‌ ట్యాగ్‌ను జోడించింది. ఆమె లాగానే చైనాలో చాలామంది ఇలాగే చేస్తున్నారు. మరో యువతి కన్సల్టింగ్ జాబ్‌ను వదులుకొని.. కాఫీ షాప్‌లో పనిచేస్తోంది. తనకు ఏ మాత్రం సంబంధం లేని ఉద్యోగాన్ని గతంలో చేసేదాన్ని అని.. దాంతో తనకు ఏం జరుగుతుందో అర్థం కాలేదని పేర్కొంది. ప్రస్తుతం చేస్తున్న పని తనలో కొత్త ఉత్తేజాన్ని అందిస్తోందని పేర్కొంది. ఇక మరో యువతి కూడా సోషల్ మీడియాలో స్పందించింది. క్షణం తీరిక లేకుండా ఆఫీస్‌లో కూర్చొని.. ఈమెయిల్స్‌, ఇంటర్వ్యూలు, మీటింగ్‌లతో విసిగిపోయి.. ఉన్న తాను.. కొత్త ఉద్యోగంలో చేరి చాలా ప్రశాంతంగా ఉన్నట్లు తెలిపింది.
కార్పొరేట్ ఉద్యోగాలు చేసే వారు చాలామంది తమలో నిరాశను నింపుకుంటున్నారని ‘న్యూయార్క్‌ యూనివర్సిటీ షాంఘై’లో సోషియాలజీ విభాగ అధిపతి ఒకరు వెల్లడించారు. ఆయా కంపెనీలు, సంస్థలు ఉద్యోగులను ఉద్యోగం కోసం కాకుండా.. మెషీన్ల లాగా పనిచేయించేందుకు రిక్రూట్ చేసుకుంటున్నారనే భావన ఎక్కువ మంది యువతలో వచ్చిందిని పేర్కొన్నారు. అది గ్రహించిన ఉద్యోగులు.. తమ ఉద్యోగాలను వదిలేసి ఇలాంటి మానసిక శ్రమ కాకుండా శారీరక శ్రమను కలిగించే జాబ్‌లు చేస్తున్నారని వెల్లడించారు. ఇందులో భాగంగానే గత ఏడాది కాలం నుంచి My First Physical Work Experience అనే హ్యాష్‌ట్యాగ్ ట్రెండింగ్ అవుతోందని చెప్పారు.
