దేశ రాజధాని దిల్లీ (Delhi)లో విచిత్ర ఘటన చోటుచేసుకుంది. అర్ధరాత్రి వేళ రోడ్డుపై ఓ జంటను దోచుకునేందుకు వచ్చిన ఇద్దరు నిందితులు.. వారి పరిస్థితి చూసి తిరిగి వారికే రూ.100 ఇచ్చి అక్కడి నుంచి పారిపోయారు. ఈ ఘటనకు సంబంధించిన ఫుటేజీలు వైరల్‌గా మారాయి. పోలీసులు తెలిపిన వివరాల ప్రకారం.. దిల్లీలో ఇటీవల ఇద్దరు వ్యక్తులు మద్యం మత్తులో ఓ జంటను తుపాకీతో బెదిరించి దోచుకునేందుకు ప్రయత్నించారు. ఈ క్రమంలో వారి జేబులు తనిఖీ చేశారు. అయితే, వారి వద్ద కేవలం రూ.20 మాత్రమే ఉన్నాయి. ఆ మహిళ ఒంటిపై ఉన్న ఆభరణాలు కూడా రోల్డ్ గోల్డ్‌వేనని గుర్తించారు. దీంతో వారే తిరిగి ఆ జంటకు రూ.100 ఇచ్చి అక్కడినుంచి ద్విచక్ర వాహనంపై జారుకున్నారు. ఇద్దరు నిందితుల్లో ఒకరు జీఎస్టీ అకౌంటెంట్‌ కాగా, మరొకరు ఓ ప్రైవేట్ కంపెనీ ఉద్యోగిగా పోలీసులు గుర్తించారు. వీరిద్దరూ పలు ప్రాంతాల్లో ఈ విధమైన దోపిడీలకు పాల్పడుతున్నట్లు విచారణలో తేలిందన్నారు. నిందితులను అరెస్టు చేసి, వారి వద్ద నుంచి తుపాకీ, ద్విచక్ర వాహనం, 30 ఫోన్‌లను స్వాధీనం చేసుకున్నట్లు చెప్పారు. వారిని గుర్తించేందుకు 200కు పైగా సీసీటీవీ ఫుటేజీలను జల్లెడ పట్టినట్లు దిల్లీ పోలీసులు వెల్లడించారు.
