విశాఖపట్నం పోర్టు అథారిటీ మరో అరుదైన ఘనత సాధించింది. ఒక షిప్పు ద్వారా ఒక రోజులో అత్యధిక కంటైనర్లను హ్యాండిల్‌ చేసిన రికార్డును సొంతం చేసుకుంది. 2021 డిసెంబర్‌లో విశాఖపట్నం పోర్టు పరిధిలోని కంటైనర్‌ టెర్మినల్‌లో ఒక నౌక నుంచి 3921 టిఇయుల కంటైనర్లను హ్యాండిల్‌ చేసి ఒక రోజు అత్యధిక కంటైనర్లను హ్యాండిల్‌ చేసిన ఘనతను ఈ పోర్టు సొంతం చేసుకుంది. ఎంవిఎంఎస్‌సి అల్డి 111 నౌక ద్వారా పోర్టు ఈ కంటైనర్లను హ్యాండిల్‌ చేసింది. తాజాగా ఈ నెల ఎనిమిదిన ఒక షిప్పు ద్వారా 4035 టిఇయుల కంటైనర్లను హ్యాండిల్‌ చేసి పాత రికార్డును తిరగరాసింది. ఎంఎస్‌సి గైడ 111 నౌక ద్వారా ఈ కంటైనర్లను హ్యాండిల్‌ చేసింది. ఈ ఘనతను సాధించిన టెర్మినల్‌ ఆపరేటర్‌, సిబ్బందిని పోర్టు చైర్మన్‌ డాక్టర్‌ ఎం అంగముత్తు అభినందించారు.
