రెండు జాతుల మధ్య వైరంతో గత రెండున్నర నెలలుగా మణిపూర్ అట్టుడుకుతోంది. ఇటీవల ఇద్దరు మహిళలను కొందరు వ్యక్తులు నగ్నంగా ఊరేగిస్తున్న ఘటన యావత్‌ దేశాన్ని సిగ్గుతో తలదించుకునేలా చేసింది. మే 4న చోటుచేసుకున్న ఈ ఘటనకు సంబంధించిన వీడియో.. జూలై 19న సోషల్‌ మీడియాలో ప్రత్యక్షమయింది. దీంతో కేంద్ర, రాష్ట్ర ప్రభుత్వాలపై దేశ వ్యాప్తంగా విమర్శలు చేశారు. నిందితులపై కఠిన చర్యలు తీసుకోవాలని డిమాండ్ చేశారు.ఇదిలా ఉండగా.. తాజాగా ఈ ఘటనపై అగ్రదేశమైన అమెరికా స్పందించింది. దీనిని క్రూరమైన, భయంకరమైన ఘటనగా అభివర్ణించారు. బాధితులకు యూఎస్ ప్రభుత్వం సానుభూతిని ప్రకటించింది. మానవ హక్కులను కాపాడాలని స్థానిక ప్రభుత్వాన్ని కోరింది. కాగా, ఈ ఘటనకు సంబంధించి ఓ మైనర్ సహా ఆరుగురిని పోలీసులు అరెస్ట్ చేశారు. ఇప్పటికే ఈ అంశంపై స్పందించిన ప్రధాని నరేంద్ర మోడీ నిందితులను ఎట్టిపరిస్థితుల్లో వదిలేదని అని స్ట్రాంగ్‌గా రియాక్ట్ అయ్యారు.
