సామాజిక మాధ్యమాల్లో రీల్స్‌ చేయడానికి ఐఫోన్ కొనాలనుకున్న దంపతులు డబ్బుల కోసం కన్నబిడ్డనే అమ్మేశారు. ఈ దిగ్భ్రాంతికర ఘటన పశ్చిమ బెంగాల్‌లో చోటుచేసుకుంది. ఉత్తర 24 పరగణాల జిల్లా పోలీసులు తెలిపిన వివరాల ప్రకారం.. పానిహతిలోని గాంధీనగర్‌కు చెందిన జయదేవ్‌, సాథి దంపతులకు ఏడేళ్ల కుమార్తె, 8 నెలల కుమారుడు ఉన్నారు. కొద్దిరోజులుగా వారి కుమారుడు కనిపించకపోవడంపై స్థానికులకు అనుమానం వచ్చింది. దీనికితోడు ఆ దంపతులు రాష్ట్రంలోని వివిధ ప్రాంతాలకు వెళ్లి రీల్స్‌ చేసి సామాజిక మాధ్యమాల్లో పోస్ట్‌ చేయడం గుర్తించారు. పసికందు గురించి స్థానికులు ప్రశ్నించగా.. అమ్మేసినట్లు జయదేవ్‌, సాథి తెలిపారు. ఆ డబ్బుతో ఐఫోన్ కొన్నట్లు చెప్పారు. దీంతో వారు పోలీసులకు సమాచారం అందించడంతో భార్యాభర్తలను అదుపులోకి తీసుకుని విచారించారు.
