తిరుమలలో మరో చిరుత చిక్కింది. లక్ష్మీనరసింహస్వామి ఆలయం వద్ద ఏర్పాటు చేసిన బోనులో చిరుత చిక్కినట్లు అటవీశాఖ, తితిదే అధికారులు తెలిపారు. ఇటీవల అలిపిరి నడక మార్గంలో చిరుత దాడి చేయడంతో నెల్లూరు జిల్లాకు చెందిన ఆరేళ్ల బాలిక లక్షిత మృతిచెందిన విషయం తెలిసిందే.ఈ నేపథ్యంలో చిరుతను బంధించేందుకు నడక మార్గంలో మూడు ప్రాంతాల్లో బోన్లు ఏర్పాటు చేశారు. మోకాలిమిట్ట, లక్ష్మీనరసింహస్వామి ఆలయం, 35వ మలుపు వద్ద బోన్లు ఉంచారు. ఈ క్రమంలో మూడు రోజుల క్రితం బోనులో ఓ చిరుత చిక్కగా.. తాజాగా గురువారం వేకువజామున మరో చిరుత చిక్కినట్లు అధికారులు తెలిపారు. 50 రోజుల వ్యవధిలో మూడు చిరుతలను బంధించినట్లు చెప్పారు.
