తెలంగాణ అసోసియేషన్ అఫ్ యునైటెడ్ కింగ్డమ్ (టాక్) ఆద్వర్యం లో అక్టోబర్ 21 న నిర్వహిస్తున్న “లండన్ – చేనేత బతుకమ్మ – దసరా ” వేడుకల పోస్టర్ ని ఎమ్మెల్సీ కవిత హైదరాబాద్ లో ఆవిష్కరించారు.
తెలంగాణ రాష్ట్ర ప్రభుత్వం చేనేతకు చేయూతనివ్వడానికి చేస్తున్న కార్యక్రమాలకు స్పూర్తితో, గత కొన్ని సంవత్సరాలుగా టాక్ జరిపే బతుకమ్మ వేడుకలను “చేనేత బతుకమ్మ” గా నిర్వహిస్తున్నామని, వీలైనంత వరకు ప్రవాసులల్లో చేనేత పై అవగాహన కలిపించి, వీలైనన్ని సందర్భాల్లో చేనేత వస్త్రాలు ధరించి నేత కుటుంబాలకు అండగా నిలవాలని కోరుతున్నట్టు నిర్వాహకులు తెలిపారు.
చేనేత పేరుతో బతుకమ్మ వేడుకల్ని నిర్వహించడం వినూత్నంగా ఉందని, వీరి ప్రయత్నం ఫలించి నేత కుటుంబాలకు మేలు జరగాలని కోరుతూ కవిత శుభాకాంక్షలు తెలిపారు .
టాక్ అధ్యక్షుడు రత్నాకర్ కడుదుల ఫోన్ ద్వారా మీడియా కి తమ సందేశాన్నిస్తూ, టాక్ సంస్థ ఆవిర్భావం నుండి నేటి వరకు అన్ని సందర్భాలలో కవిత గారి ప్రోత్సాహం చాలా గొప్పదని, నేటి “చేనేత బతుకమ్మ” పోస్టర్ ఆవిష్కరించి అలాగే ఆశీర్వదించి మాలో నూతన ఉత్సాహాన్ని నింపిన కవిత గారికి ప్రత్యేక కృతఙ్ఞతలు తెలియజేస్తున్నట్టు చెప్పారు.
అన్నివేళలా వారి సూచనలు సలహాలు మాకెంతో ప్రోత్సహాన్ని కలిగిస్తున్నాయని , చేనేత కుటుంబాల సంక్షేమం పట్ల వారికి ఎంత శ్రద్ధ ఉందని, ఇటువంటి కార్యక్రమాల వల్ల వారికి వీలైనంత చేయూత అందితే చాలా సంతోషమని కవిత తెలిపారు.
యూకే లో నివసించే ప్రవాస ఆడబిడ్డలంతా వేడుకల్లో పాల్గొని మన సంస్కృతిని విశ్వవ్యాప్తం చేద్దామని, ఈ సంవత్సరం అక్టోబర్ 21 న సాయంకాలాన మన ఊర్లో జరిగినట్టు వేడుకులు నిర్వహిస్తున్నామని, ప్రవాసులంతా సాయంత్రం 4 గం. ల నుండి వెస్ట్ లండన్ లోని ” లంప్టోన్ స్కూల్ “( Lampton School,Lampton Avenue,Hounslow,TW3 4EP) ఆడిటోరియం లో జరిగే వేడుకలకు , వీలైతే చేనేత దుస్తులు ధరించి వేడుకల్లో పాల్గొనాలని, మనమంతా చేనేతకు అండగా నిలవాల్సిన చారిత్రాత్మక సమయమిదని తెలిపారు.
మరిన్ని వివరాలకు www.tauk.org.uk వెబ్సైట్ ను సందర్శించాలని తెలిపారు.
నేడు రాష్ట్ర ప్రభుత్వం కూడా తెలంగాణ ఆడబిడ్డలకు బతుకమ్మ కానుకగా చేనేత చీరలను అందిస్తుందని, మనమంతా మన ముఖ్యమంత్రి కెసిఆర్ గారి ఆశయాలకు అనుగుణంగా, ప్రపంచవ్యాప్తంగా నిర్వహిస్తున్న అన్ని బతుకమ్మ వేడుకల్లో, చేనేతకు ప్రాధాన్యతనిస్తూ, చేనేత దుస్తులతో వేడుకలను జరుపుకుంటే, చేనేత కుటుంబాలలో గొప్ప భరోసా వస్తుందని తెలిపారు.
ఈ పోస్టర్ ఆవిష్కరణలో పాల్గొన్న మాజీ ఎమ్మెల్సీ వీ. గంగాధర్ గౌడ్, టాక్ వ్యవస్థాపకులు – తెలంగాణ రాష్ట్ర చలనచిత్రాభివృది సంస్థ ( ఎఫ్దీసి ) చైర్మన్ అనిల్ కూర్మాచలం, తెలంగాణ రాష్ట్ర ఫుడ్స్ కార్పొరేషన్ చైర్మన్ మేడే రాజీవ్ సాగర్ గార్లకు ,తెలంగాణ సామాజిక కార్యకర్తలు తిరుమందాస్ నరేష్ గౌడ్, బత్తిని వినయ్ మరియు నాగరాజు లకు, అలాగే నేటి కార్యక్రమానికి సహకరించిన కవిత గారి సిబ్బందికి టాక్ సంస్థ ప్రత్యేక కృతఙ్ఞతలు తెలిపారు.
