సాధారణ బస్సులకు కూడా సాంకేతికతను అనుసంధానం చేయాలని ఆర్టీసీ నిర్ణయించింది. సామాన్యులు ప్రయాణించే పల్లె వెలుగు, సిటీ ఆర్డినరీల రాకపోకల సమాచారాన్ని ఉన్నచోటు నుంచే తెలుసుకునే సదుపాయాన్ని ప్రారంభించింది. ట్రాక్‌ చేసేలా ఈ బస్సులను ‘గమ్యం’ యాప్‌తో అనుసంధానం చేయాలని అన్ని బస్‌డిపోలకు ఆదేశాలు పంపించింది. గ్రామీణ ప్రాంతాల్లో తిరిగే ఈ బస్సులకు ప్రైవేటు ఆటోలు, జీపుల నుంచి పోటీ అధికం. ప్రయాణికులు కోరుకున్నచోట ప్రైవేటు వాహనాలను ఆపుతున్నారు. ఆర్టీసీలో అలాంటి పరిస్థితి ఉండదు. పైగా ఈ బస్సులు ఎప్పుడు వస్తాయో సమాచారం పక్కాగా ఉండదు. ‘గమ్యం’ యాప్‌తో ఈ బస్సుల్ని అనుసంధానిస్తే ఏ బస్సు ఎప్పుడు వస్తుంది? ఎంతదూరంలో ఉందన్న సమాచారం తెలిసిపోతుంది. యాప్‌లో రూట్లవారీగా షెడ్యూల్‌ బస్సులు ఎన్ని, రన్నింగ్‌లో ఉన్న బస్సులేవి.. ఎంత సమయానికి వస్తాయో తెలుసుకోవచ్చు. బస్టాప్‌లో కాకుండా రోడ్డుమార్గంలో మధ్యలో ఎక్కడైనా ఉన్నప్పుడు యాప్‌లో ‘ఫ్లాగ్‌ ఏ బస్‌’ ఆప్షన్‌ క్లిక్‌ చేస్తే ఫోన్‌ స్క్రీన్‌ ఫ్లోరోసిస్‌ లైట్‌గా మారిపోతుంది. ముఖ్యంగా రాత్రి వేళల్లో ఈ ఫీచర్‌ బాగా ఉపయోగపడుతుంది. ఈ లైట్‌ కనిపించినప్పుడు బస్సును ఆపి ప్రయాణికుల్ని ఎక్కించుకునేలా డ్రైవర్లకు ఆర్టీసీ అవగాహన కల్పిస్తోంది.
