గూగుల్‌ తన ప్లేస్టోర్‌ నుంచి 2,500 మోసపూరిత రుణ యాప్‌లను తొలగించిందని కేంద్ర ప్రభుత్వం వెల్లడించింది. 2021 ఏప్రిల్‌ నుంచి 2022 జులై మధ్య ఈ చర్యలు తీసుకుందని సోమవారం పార్లమెంటులో ఇచ్చిన లిఖితపూర్వక సమాధానంలో కేంద్ర ఆర్థిక మంత్రి నిర్మలా సీతారామన్‌ తెలిపారు. ఈ విషయంలో రిజర్వు బ్యాంకు, ఇతర నియంత్రణ సంస్థలతో కేంద్రం ఎప్పటికప్పుడు సంప్రదిస్తూనే ఉందని వివరించారు. చట్టబద్ధంగా నడుస్తున్న లోన్‌ యాప్‌ల వివరాలను రిజర్వు బ్యాంకు ప్రభుత్వానికి అందించిందని, ఆ వివరాలను కేంద్ర ఎలక్ట్రానిక్స్‌ అండ్‌ ఐటీశాఖ గూగుల్‌కు పంపిందని తెలిపారు. గూగుల్‌ తన విధివిధానాలను పటిష్ఠం చేసిందని వెల్లడించారు.కొత్త విధానంలో సమ్మతి పొందిన యాప్‌లనే ఆ సంస్థ ప్లేస్టోర్‌లో అనుమతిస్తోందన్నారు. భారతీయ సైబర్‌ నేరాల సమన్వయ కేంద్రం (14సీ), కేంద్ర హోంశాఖ డిజిటల్‌ లోన్‌ యాప్‌లను పర్యవేక్షిస్తున్నాయని వెల్లడించారు.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
