ఎన్టీఆర్‌ ‘దేవర’ సందడి మొదలైంది. ఈ చిత్ర గ్లింప్స్‌ విడుదల తేదీపై స్పష్టత వచ్చింది. దీన్ని ఈ నెల 8న విడుదల చేయనున్నట్లు చిత్ర బృందం సోమవారం అధికారికంగా ప్రకటించింది. ఈ మేరకు ఓ కొత్త పోస్టర్‌ను అభిమానులతో పంచుకుంది. దాంట్లో ఎగసిపడుతున్న అలలతో కల్లోలంగా ఉన్న సముద్రంలో.. పడవపై ఓ కెరటంలా దూసుకొస్తూ ఎన్టీఆర్‌ కనిపించారు. బ్యాగ్రౌండ్‌లో కారు మబ్బులతో కమ్ముకొని ఉన్న ఆకాశం.. చుట్టూ ఉన్న పడవలు.. సీరియస్‌గా చూస్తూ కనిపించిన తీరు ఆసక్తి రేకెత్తించేలా ఉన్నాయి. ‘జనతా గ్యారేజ్‌’ లాంటి హిట్‌ తర్వాత ఎన్టీఆర్‌ – కొరటాల శివ కలయికలో రూపొందుతోన్న రెండో చిత్రమిది. మాస్‌ యాక్షన్‌ ఎంటర్‌టైనర్‌గా ముస్తాబవుతోన్న ఈ సినిమాని ఎన్టీఆర్‌ ఆర్ట్స్‌, యువసుధ ఆర్ట్స్‌ సంస్థలు నిర్మిస్తున్నాయి. ఈ చిత్రం రెండు భాగాలుగా రానుండగా.. తొలి భాగం ‘దేవర పార్ట్‌ 1’ పేరుతో ఏప్రిల్‌ 5న థియేటర్లలోకి వస్తుంది. ఈ సినిమాలో జాన్వీ కపూర్‌ కథానాయిక. సైఫ్‌ అలీ ఖాన్‌ ప్రతినాయకుడిగా నటిస్తున్నారు. అనిరుధ్‌ సంగీతమందిస్తుండగా.. రత్నవేలు ఛాయాగ్రాహకుడిగా వ్యవహరిస్తున్నారు.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
