తానా అధ్యక్షుడు నిరంజన్ శృంగవరపు ఏపీ ముఖ్యమంత్రి చంద్రబాబును మర్యాదపూర్వకంగా కలిశారు. సరైన నాయకత్వం రాష్ట్రాన్ని సరైన దిశలో నడిపిస్తుందని నమ్మి ప్రవాసులు గత ఎన్నికల్లో నిజాయితీగా పనిచేశారని ఈ సందర్భంగా చంద్రబాబు ప్రవాసులకు ధన్యవాదాలు తెలిపారని నిరంజన్ వెల్లడించారు. అమెరికాలోని జాతీయ, ప్రాంతీయ తెలుగు సంఘాల శక్తి సామర్థ్యాలను విరివిగా వినియోగించుకోగలిగే ఒక సమగ్ర వేదికను రూపొందించేందుకు ప్రభుత్వం సిద్ధంగా ఉందన్న చంద్రబాబు, ఆ దిశగా తానా కూడా ప్రణాళికలు రచించాలని చంద్రబాబు సూచించారు. గత ఎన్నికల్లో ప్రవాసులకు పెద్దపీట వేసి సమాజ సేవలో వారు భాగస్వామ్యులు అయ్యేందుకు అవకాశం కల్పించిన తెదేపాకు నిరంజన్ ధన్యవాదాలు తెలిపారు. భారత పర్యటనకు వచ్చే ప్రవాసులకు ఎదురయ్యే ఇబ్బందులను అధిగమించేందుకు ఓ వ్యవస్థను ఏర్పాటు చేయాలన్న అభిప్రాయాన్ని చంద్రబాబుకు వివరించామని నిరంజన్ వెల్లడించారు. అనంతరం అచ్చెన్నాయుడును కూడా ఈ బృందం కలుసుకుంది. ఈ కార్యక్రమంలో నిరంజన్‌తో పాటు తానా మాజీ అధ్యక్షుడు తాళ్లూరి జయశేఖర్, తానా న్యూయార్క్ ప్రాంతీయ ప్రతినిధి వంశీ వాసిరెడ్డి, చికాగో నుండి రవి అనుమోలు తదితరులు పాల్గొన్నారు.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
