సిలికానాంధ్ర సంస్థ ఆధ్వర్యంలో కూచిపూడిలో నిర్వహిస్తున్న సంజీవని వైద్యాలయంలో ధన్వంతరి వార్డును ఏపీ ఆరోగ్య శాఖ మంత్రి సత్యకుమార్ యాదవ్ ప్రారంభించారు. వైద్యం వ్యాపారంగా మారిన నేటి తరుణంలో గ్రామీణ ప్రాంతాల్లో వైద్యసేవలు చేస్తున్న సిలికానాంధ్ర సంస్థను మంత్రి అభినందించారు. ఈ మహత్కార్యానికి శ్రీకారం చుట్టి అనేక ఒడిదుడుకులు ఎదుర్కొని నిర్విరామంగా సేవ చేస్తున్న సిలికానాంధ్ర వ్యవస్థాపకుడు, ఆసుపత్రి ఛైర్మన్ కుచిభొట్ల ఆనంద్ ని ఆయన అభినందించారు.
ఈ ఆసుపత్రి ప్రారంభోత్సవం నాడు ₹10కోట్లకు చంద్రబాబు హయాంలోని ప్రభుత్వం జీవో ఇచ్చిందని, ప్రభుత్వ మార్పులతో మరుగున పడిన ఆ జీవోను పునరుద్ధరిస్తామని మంత్రి హామీనిచ్చారు. ఆసుపత్రికి పన్ను మినహాయింపు గురించి పంచాయతీరాజ్ శాఖ మంత్రి పవన్‌కళ్యాణ్‌కు సూచిస్తానని సత్యకుమార్ తెలిపారు.
ఆనంద్ మాట్లాడుతూ ఈ ఆసుపత్రిలో 7విభాగాల్లో NTR వైద్యసేవ ద్వారా ఉచితంగా వైద్యం అందిస్తున్నామని, దానిలో భాగంగానే ఈ రోజు నుండి నూతనంగా ధన్వంతరి వార్డ్ ద్వారా మరో 30పడకలు అందుబాటులోకి తీసుకురావడం జరిగిందని, దీన్ని ప్రజలు వినియోగించుకోవాలని కోరారు. ఈ కార్యక్రమములో సభాద్యక్షులుగా పామర్రు శాసనసభ్యులు వర్ల కుమార్ రాజ, ఆత్మీయ అతిధులుగా అవనిగడ్డ శాసనసభ్యులు మండలి బుద్ధ ప్రసాద్, TV9-RTV ఫౌండర్ రవిప్రకాష్, హాస్పిటల్ అడ్మనిస్ట్రేటివ్ ఆఫీసర్ జె.హనుమకుమార్, కృష్ణ జిల్లా DMHO గీతాబాయ్, కూచిపూడి గ్రామ సర్పంచ్ కె.విజయలక్ష్మి, సంజీవని హాస్పిటల్ వైద్య బృందం, సిబ్బంది, హాస్పిటల్ సలహా కమిటీ సభ్యులు తదితరులు పాల్గొన్నారు.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
