టెక్ దిగ్గజం ‘స్పేస్ఎక్స్ (SpaceX)’ ప్రతిష్ఠాత్మకంగా నిర్మించిన ‘స్టార్షిప్ (Starship)’ భారీ రాకెట్ విజయవంతంగా నింగిలోకి ఎగిసింది. స్థానిక కాలమానం ప్రకారం.. శనివారం (నవంబరు 18) ఉదయం దక్షిణ టెక్సాస్ తీరం నుంచి ఈ ప్రయోగం చేపట్టింది. ఈ ఏడాది ఏప్రిల్లో స్టార్షిప్ మొదటి టెస్ట్ఫ్లైట్ విఫలమైన విషయం తెలిసిందే. గాల్లోకి ఎగిరిన కేవలం 4 నిమిషాలకే గల్ఫ్ ఆఫ్ మెక్సికోలో ఇది కూలిపోయింది. దీంతో తొలి ప్రయోగంలోని వైఫల్యాలను విశ్లేషించి.. రాకెట్, ల్యాంచ్ ప్యాండ్లను మరింత అభివృద్ధి చేసింది. అమెరికా గగనతల నిర్వహణ సంస్థ (FAA) సూచించిన 57 మార్పులూ చేపట్టింది. ఎఫ్ఏఏ అనుమతి అనంతరం ఈ ప్రయోగం చేపట్టింది.
తాజా ప్రయోగంలో రాకెట్ గాల్లోకి ఎగిరిన 2.48 నిమిషాల తర్వాత బూస్టర్ విజయవంతంగా విడిపోయింది. దాదాపు గంటన్నర పాటు సాగనున్న ఈ టెస్ట్ ఫ్లైట్లో భాగంగా.. ప్రయోగం ప్రారంభంలో విడిపోయే బూస్టర్ను గల్ఫ్ ఆఫ్ మెక్సికోలో పడేలా చర్యలు తీసుకున్నారు. స్పేస్క్రాఫ్ట్ మాత్రం భూమి చుట్టు దాదాపు ఒక పరిభ్రమణం సాగించి, పసిఫిక్ మహాసముద్రంలో పడిపోయేలా తయారుచేశారు. రెండు సెక్షన్ల (బూస్టర్, స్పేస్క్రాఫ్ట్) ఈ ‘స్టార్షిప్ (Starship)’ రాకెట్ పొడవు ఏకంగా 121 మీటర్లు(400 అడుగులు) ఉండటం గమనార్హం. ప్రపంచంలోనే అతిపెద్ద రాకెట్గా పేరుపొందిన దీన్ని.. చందమామ, అంగారకుడిపై యాత్రలకు వీలుగా ‘స్పేస్ఎక్స్ రూపొందించింది.
👉 – Please join our whatsapp channel here –