రోడ్డు ప్రమాద బాధితులకు నగదు రహిత చికిత్స (Cashless Treatment) అందించేందుకు కేంద్ర ప్రభుత్వం యోచిస్తున్నట్లు తెలిసింది. రానున్న మూడు, నాలుగు నెలల్లో దీనిని దేశవ్యాప్తంగా అందుబాటులోకి తెచ్చేందుకు రోడ్డు రవాణా మరియు రహదారుల మంత్రిత్వ శాఖ (MoRTH) ప్రణాళిక సిద్ధం చేస్తున్నట్లు కేంద్ర ప్రభుత్వ ఉన్నత వర్గాలు వెల్లడించాయి. మోటార్‌ వాహనాల సవరణ చట్టం 2019లో (MV Act) భాగంగా దీనిని తీసుకురానున్నట్లు తెలిపాయి.
‘ప్రమాదాల్లో (Road Accidents) గాయపడిన బాధితులకు ఉచిత, నగదు రహిత వైద్య చికిత్స అందించడం ఎంవీఏ యాక్టు 2019లో భాగం. ఇప్పటికే కొన్ని రాష్ట్రాలు దీన్ని అమలు చేస్తున్నాయి. ఇప్పుడు కేంద్ర ఆరోగ్య, కుటుంబ సంక్షేమశాఖ సహకారంతో రోడ్డు రవాణా, హైవే మంత్రిత్వశాఖ దీన్ని దేశవ్యాప్తంగా అమలు చేయనుంది’ అని రోడ్డు రవాణా మరియు రహదారుల మంత్రిత్వ శాఖ కార్యదర్శి అనురాగ్‌ జైన్‌ పేర్కొన్నారు. సుప్రీం కోర్టు తీర్పునకు అనుగుణంగా ప్రమాదం జరిగిన వెంటనే సమీప ఆసుపత్రిలో ఉచిత వైద్య సాయం కల్పించడమే దీని ఉద్దేశమన్నారు. గోల్డెన్‌ అవర్‌ (ప్రమాదం జరిగిన గంటలోపే)తో సహా రోడ్డు ప్రమాద బాధితులందరికీ దీన్ని వర్తింపజేస్తామన్నారు. వచ్చే మూడు, నాలుగు నెలల్లో ఇది అందుబాటులోకి రానుందన్నారు.
ప్రపంచంలో రోడ్డు ప్రమాదాల్లో ప్రాణాలు కోల్పోతున్న ఘటనలు అత్యధికంగా భారత్‌లోనే ఉంటున్నాయని అనురాగ్‌ జైన్‌ పేర్కొన్నారు. రోడ్డు భద్రతకు సంబంధించి అవగాహనపై మాట్లాడిన ఆయన.. ఈ అంశాలను పాఠశాలలు, కాలేజీ పాఠ్యాంశాల్లో చేర్చేందుకు కేంద్ర విద్యాశాఖ కూడా అంగీకరించిందని అన్నారు. ఇన్‌స్టిట్యూట్‌ ఆఫ్‌ రోడ్‌ ట్రాఫిక్‌ ఎడ్యుకేషన్‌ (IRTE) ఏర్పాటు చేసిన ఓ కార్యక్రమంలో పాల్గొన్న అనురాగ్‌ జైన్‌ ఈ వివరాలు వెల్లడించారు.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
