మహేశ్‌ బాబు-త్రివిక్రమ్‌ కాంబినేషన్‌లో తెరకెక్కుతోన్న చిత్రం ‘గుంటూరు కారం’. ఈ చిత్రం నుంచి ఇటీవల ఓ పాటను విడుదల చేసిన సంగతి తెలిసిందే. దానిపై కొందరు నెటిజన్లు అసంతృప్తి వ్యక్తం చేశారు. దీంతో ఈ సినిమాపై రకరకాల ప్రచారాలు మొదలయ్యాయి. ఈ నేపథ్యంలో ఓ నెటిజన్ ట్వీట్‌కు నాగవంశీ (Naga Vamsi) స్ట్రాంగ్‌ రిప్లై ఇచ్చారు.
‘‘గుంటూరు కారం’లోని మాస్‌ సాంగ్‌పై మహేశ్‌ బాబు (Mahesh Babu) అసంతృప్తి వ్యక్తం చేశారు.. ఈ విషయంలో దర్శకులకు, సంగీత దర్శకులకు ఆయన క్లాసు తీసుకున్నారు. ప్రస్తుతం దాన్ని రీ వర్క్‌ చేస్తున్నారు’’ అంటూ ఓ నెటిజన్ పేర్కొన్నారు. దీనిపై నిర్మాత స్పందిస్తూ.. ‘‘గుంటూరు కారం’ (Guntur Kaaram) సినిమాలో మొత్తం నాలుగు పాటలతో పాటు ఒక బిట్‌ సాంగ్‌ ఉంది. మూడు పాటల షూటింగ్‌ కూడా పూర్తయింది. మిగిలిన ఒక్క పాట చిత్రీకరణ కూడా షెడ్యూల్‌ ప్రకారం డిసెంబర్‌ 21 నుంచి ప్రారంభమవుతుంది. ప్రస్తుతం సోషల్‌ మీడియాలో జరుగుతున్న ప్రచారంలో ఎలాంటి నిజం లేదు. ఈ సినిమాలోని పాటల గురించి జరుగుతున్నదంతా ప్రచారం మాత్రమే. లైకుల కోసం కొందరు ఇలాంటి తప్పుడు సమాచారాలను ప్రచారం చేస్తున్నారు. మహేశ్‌ ఫ్యాన్స్‌ ఇలాంటి వార్తలకు స్పందిస్తారని రూమర్స్‌ సృష్టించే వాళ్లకు తెలుసు. ఇలాంటి ఫేక్ న్యూస్‌లకు చిత్ర బృందం స్పందించడం లేదంటే అవి నిజం కాదని దానర్థం’’ అని పేర్కొన్నారు.
ఇక గుంటూరు కారం సినిమా విషయానికొస్తే.. ప్రస్తుతం దీని చిత్రీకరణ చివరి దశలో ఉంది. మాస్‌ అవతార్‌లో మహేశ్‌ కనిపించనున్న ఈ చిత్రంలో శ్రీలీల, మీనాక్షి చౌదరి ఆడిపాడనున్నారు. జనవరి 12న సంక్రాంతి కానుకగా ప్రేక్షకుల ముందుకు రానుంది. తాజాగా దీని విడుదల వాయిదా పడనుందని కూడా వార్తలు వచ్చిన సంగతి తెలిసిందే. చిత్రబృందం వాటిపై స్పందిస్తూ.. షెడ్యూల్‌ ప్రకారమే విడుదల చేస్తామని చెప్పింది.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
