వచ్చే ఏప్రిల్‌లో 55 మంది రాజ్యసభ సభ్యులు పదవీ విరమణ చేయనున్నారు. వారిలో అత్యధికంగా 27 మంది భాజపాకు చెందినవారు కాగా, 10 మంది కాంగ్రెస్‌ నేతలు. భారాస నుంచి ముగ్గురు, తెదేపా, వైకాపాల నుంచి ఒక్కొక్కరు కూడా ఈ జాబితాలో ఉన్నారు. ఈ స్థానాల భర్తీకి మార్చిలోనే ఎన్నికలు జరిగే అవకాశాలున్నాయి. ఏప్రిల్‌లో ఎగువ సభకు వీడ్కోలు పలకనున్న భాజపా నేతల్లో ఆ పార్టీ అధ్యక్షుడు జె.పి.నడ్డాతోపాటు కేంద్ర మంత్రులు ధర్మేంద్ర ప్రధాన్‌, అశ్వినీ వైష్ణవ్‌, మన్‌సుఖ్‌ మాండవీయ, భూపేందర్‌ యాదవ్‌, నారాయణ రాణే, పరుషోత్తమ్‌ రూపాలా, రాజీవ్‌ చంద్రశేఖర్‌, వి.మురళీధరన్‌, ఎల్‌.మురుగన్‌ తదితరులు ఉన్నారు. ఉత్తర్‌ప్రదేశ్‌ నుంచి కమలదళం తరఫున ప్రాతినిధ్యం వహిస్తున్న జి.వి.ఎల్‌.నరసింహారావు పదవీకాలమూ ఏప్రిల్‌తో పూర్తికానుంది. మాజీ ప్రధానమంత్రి మన్మోహన్‌ సింగ్‌ రాజస్థాన్‌ నుంచి రాజ్యసభ ఎంపీగా ఉన్నారు. ఏప్రిల్‌తో ఆయన పదవీకాలం ముగియనుంది. ప్రస్తుతం అనారోగ్యం కారణంగా ఆయన నడవలేని స్థితిలో ఉన్నారు. కాబట్టి మళ్లీ పెద్దల సభకు పోటీ చేయకుండా తప్పుకొనే అవకాశాలు కనిపిస్తున్నాయి.
నడ్డా స్థానం గల్లంతు!
రాజ్యసభకు మార్చిలో జరిగే ఎన్నికల్లో- ఉత్తర్‌ప్రదేశ్‌లో భాజపాకు 6, సమాజ్‌వాదీ పార్టీకి మూడు సీట్లు వచ్చే అవకాశాలున్నాయి. మహారాష్ట్రలోని ఆరు సీట్లను కమలదళం-ప్రతిపక్షాలు ప్రస్తుతం ఉన్నట్లే సగం సగం పంచుకొనే సూచనలు కనిపిస్తున్నాయి. బిహార్‌లో జేడీయూ, ఆర్‌జేడీ కూటమి మెజార్టీ సీట్లు కైవసం చేసుకోవడం దాదాపుగా ఖాయమే. గుజరాత్‌లో రెండు సీట్లను కాంగ్రెస్‌ నుంచి భాజపా లాగేసుకునే అవకాశాలున్నాయి. కమలనాథులు రాజస్థాన్‌లోనూ మరో సీటును అధికంగా గెలుచుకొని.. ఉత్తరాఖండ్‌, ఛత్తీస్‌గఢ్‌, హరియాణా, మధ్యప్రదేశ్‌ల్లో ఇప్పుడున్న బలాన్ని నిలబెట్టుకునే వీలుంది. హిమాచల్‌ప్రదేశ్‌లోని స్థానాన్ని హస్తం పార్టీకి కమలదళం కోల్పోనుంది. అందువల్ల ప్రస్తుతం అక్కణ్నుంచి ప్రాతినిధ్యం వహిస్తున్న నడ్డా వేరే రాష్ట్రానికి మారాల్సి వస్తుంది. కాంగ్రెస్‌ కర్ణాటకలో తన బలాన్ని నిలుపుకొని, తెలంగాణలో రెండు సీట్లు లాభపడే వీలుంది. ఇక్కడ భారాస రెండింటిని కోల్పోయి ఒక సీటును నిలబెట్టుకునే సూచనలు ఉన్నాయి. ఆంధ్రప్రదేశ్‌లో వైకాపా ఇప్పుడున్న ఒక సీటుకు అదనంగా మరో రెండు స్థానాలను గెలుచుకొనే అవకాశాలు కనిపిస్తున్నాయి.
👉 – Please join our whatsapp channel here –
https://whatsapp.com/channel/0029Va9VucP7oQhZ7fePda2Z
