భారత విద్యార్థులు లండన్ విశ్వవిద్యాలయాల బాట పడుతున్నారు. బ్రిటన్ రాజధానికి వచ్చి చదువుకుంటున్న విదేశీ విద్యార్థుల సంఖ్యకు సంబంధించి భారత్ మూడో స్థానాన్ని తిరిగి సాధించింది. బ్రిటన్ ఉన్నత విద్య గణాంకాల సంస్థ బుధవారం విడుదల చేసిన సమాచారం ప్రకారం.. 2018-19లో లండన్లో భారత విద్యార్థుల సంఖ్యలో 34.7 శాతం మేర పెరుగుదల నమోదైంది. 2018-19లో లండన్లోని విశ్వవిద్యాలయాల్లో చదువుతున్న అంతర్జాతీయ విద్యార్థుల సంఖ్య అంతకుముందు ఏడాదితో పోల్చితే 5.8 శాతం మేర పెరిగి 1.25 లక్షలకు చేరింది. 25,650 మంది విద్యార్థులతో ఈ జాబితాలో చైనా మొదటి స్థానం, 7,460 మంది విద్యార్థులతో అమెరికా రెండో స్థానం, 7,158 మంది విద్యార్థులతో భారత్ మూడో స్థానం దక్కించుకున్నాయి. 5,625 మంది విద్యార్థులతో ఇటలీ నాలుగో స్థానానికి పరిమితమైంది.
