ప్రస్తుతానికి తాను ఎలాంటి తమిళ సినిమాలో నటించడం లేదని నటి పూజాహెగ్డే స్పష్టం చేశారు. పూజాహెగ్డే త్వరలోనే సూర్య కథానాయకుడిగా తెరకెక్కుతోన్న ‘అరువా’ చిత్రంలో నటించనున్నారంటూ గత కొన్నిరోజుల నుంచి సోషల్‌ మీడియాలో వార్తలు విపరీతంగా వస్తోన్న విషయం తెలిసిందే. ఈ నేపథ్యంలో తాజాగా పూజా ట్విటర్‌ వేదికగా స్పందించారు. కోలీవుడ్‌లో ఏ సినిమాకీ సంతకం చేయలేదని స్పష్టత ఇచ్చారు. ‘ప్రస్తుతం నేను తమిళ సినిమాలో నటిస్తున్నాననే విషయంలో మీరు ఒక నిర్ణయానికి వెళ్లకండి. ఇప్పటిదాకా నేను ఎలాంటి తమిళ సినిమాకు సంతకం చేయలేదు. కథలు వింటున్నాను. అన్ని సవ్యంగా జరిగితే కచ్చితంగా ఈ ఏడాది ఓ తమిళ సినిమా చేయాలని భావిస్తున్నాను. థ్యాంక్యూ’ అని పూజా హెగ్డే తెలిపారు.
