మధుమేహ రోగులకి చిన్నదెబ్బకే ఎముకలు విరిగిపోవడమే కాదు, దెబ్బ తగిలితే కూడా చాలా నెమ్మదిగా తగ్గుతుంది. అందుకే పెన్సిల్వేనియా విశ్వవిద్యాలయానికి చెందిన పరిశోధకులు ఎముక నిర్మాణానికి అవసరమైన ప్రొటీన్‌ను ఆహారం లేదా మాత్రల ద్వారా అందించే ప్రయత్నం చేస్తున్నారు. ఎందుకంటే- డయాబెటిస్‌ బాధితుల్లో ఇన్సులిన్‌ లోపం కారణంగానే రక్తంలో గ్లూకోజ్‌ పేరుకు పోతుందని తెలిసిందే. అదే ఇన్సులిన్‌ ఎముకల పునర్నిర్మాణానికీ తోడ్పడుతుంది. అందుకే వాళ్లలో ఎముకలు విరిగితే ఆ ప్రొటీన్‌ను ఇంజెక్షన్‌ రూపంలో ఇవ్వాలి. కానీ ఇన్సులిన్‌ ధర ఎక్కువ ఉండటంతోబాటు దాన్ని నిల్వ చేయడం, సరఫరా చేయడం కూడా కష్టం. అందుకే శాస్త్రబృందం నోటి ద్వారా ఇచ్చే మందుమీద దృష్టిని కేంద్రీకరించింది. ఇందుకోసం ఇన్సులిన్‌లా పనిచేసే ఐజిఎఫ్‌-1 అనే ప్రొటీన్‌ను రూపొందించింది. అంతేకాదు, కండరాలూ, ఎముకల పునర్నిర్మాణానికి తోడ్పడే ఈ ప్రొటీన్‌ను ఉత్పత్తి చేసే జన్యువును లెట్యూస్‌ మొక్కల్లో ప్రవేశపెట్టగా- దాని ఆకుల్లో ఈ ప్రొటీన్‌ సమృద్ధిగా కనిపించిదట. ఆ తరవాత వాటిని ఎండబెట్టి పొడిచేసి మందుని తయారుచేసి డయాబెటిస్‌ బారిన పడ్డ ఎలుకల్లో ప్రయోగించినప్పుడు- వాటిల్లో ఎముకల సాంద్రత పెరిగినట్లు గుర్తించారు. కాబట్టి త్వరలోనే ఈ ప్రొటీన్‌తో కూడిన లెట్యూస్‌ని వాడుకలోకి తీసుకొస్తే మధుమేహులతోబాటు ఆస్టియోపొరోసిస్‌తో బాధపడేవాళ్లందరికీ ఉపశమనం ఉంటుంది అంటున్నారు.
