అరటి పండ్లతో హెయిర్ మాస్క్.. ఇలా చేస్తే జుట్టు సమస్యలన్నీ దూరం!
మీ జుట్టు నిర్జీవంగా మారుతోందా? చుండ్రు.. జుట్టు రాలే సమస్యతో బాధపడుతున్నారా? అయితే, ఈ అరటి పండు మాస్క్‌లు ట్రై చేయండి.
అరటి పండ్లతో హెయిర్ మాస్క్.. అద్భుతమైన ప్రయోజనాలు
అరటి పండ్లు కడుపు నింపుకోవడానికే కాదండోయ్. అందాన్ని కూడా పెంపొందిస్తాయి. ముఖ్యంగా మీ శిరోజాలకు జీవం పోస్తాయి. అరటి పండ్లలో ఉండే మెగ్నీషియం, పోటాషియం, సిలికాన్, విటమిన్లు వల్ల మీ జుట్టు మెరిసిపోతుంది. సిలికాన్ మీ జుట్టును మరింత బలోపేతం చేస్తుంది. అరటి పండు తొక్కలో ఉండే యాంటీ మైక్రోబయల్ ఫంగల్ ఇన్ఫెక్షన్లు, చుండ్రు నివారణకు ఉపయోగపడతాయి. అయితే, అరటి పండ్లను జుట్టుకు ఎలా అప్లై చేయాలి? ఏయే కాంబినేషన్ మాస్కులతో మంచి ఫలితాలు ఉంటాయో ఇప్పుడు చూద్దాం.
అరటి పండు బొప్పాయి హెయిర్ మాస్క్: బొప్పాయి ఆరోగ్యానికి ఎంత మంచిదో తెలిసిందే. ఇది జుట్టుకు హెయిర్ కండీషనర్‌గా పనిచేస్తుంది. బొప్పాయిలో యాంటీమైక్రోబయల్, యాంటీ ఫంగల్, యాంటీఆక్సిడెంట్లు పుష్కలంగా ఉన్నాయి. ఇందులోని విటమిన్-A, విటమిన్-C జుట్టు రాలకుండా కాపాడతాయి. సన్నని, బలహీనమైన జుట్టుకు బొప్పాయి మంచిది.
ఏం కావాలి?:
అరటి పండ్లు- 2
బొప్పాయి – సగం ముక్క
తేనె – 2 టేబుల్ స్పూన్లు
ఎలా చేయాలి?:
❂ అరటి పండ్లు, బొప్పాయిని చిన్న చిన్న ముక్కలు చేయండి.
❂ ఆ మిశ్రమానికి కాస్త తేనె కలిపి పేస్టులా తయారయ్యేలా కలపండి.
ఎలా అప్లై చేయాలి?:
❂ అరటిపండు-బొప్పాయి మిశ్రమాన్ని జుట్టు మొదళ్లు వరకు పెట్టండి.
❂ షవర్ క్యాప్ లేదా కవర్‌ను తలకు పెట్టుకోని అరగంట సేపు వదిలిపెట్టండి.
❂ ఆ తర్వాత జుట్టును చల్లని నీటితో కడిగేయండి. షాంపుతో తలను శుభ్రం చేసుకోండి.
అరటి మరియు కలబంద (Aloe Vera) హెయిర్ మాస్క్:
కలబందలో A, B, C, E విటమిన్లు పుష్కలంగా ఉంటాయి. మృత కణాలను తొలగించడంలో ఇది కీలక పాత్ర పోషిస్తుంది. జుట్టు పెరిగేందుకు ఉపయోగపడుతుంది. ఇందులోని ప్రోటీయోలైటిక్ ఎంజైములు డెడ్ స్కిన్ సెల్స్‌ను రిపైర్ చేస్తాయి. జుట్టును బలోపేతం చేయడమే కాకుండా జుట్టు రాలకుండా కాపాడుతుంది.
ఇలా చేయండి:
❂ 2-3 అరటి పండ్లు, 2 కలబంద ఆకులు తీసుకోండి. కలబందలోని జిగురును తీసుకోండి.
❂ అరటి పండ్లను ముక్కులు చేసి మిక్సిలో వేయండి. అందులో కలబంద మిశ్రమాన్ని కూడా అందులో వేసి పేస్టులా తయారు చేయండి.
❂ ఆ పేస్టును తలకు రంగు వేసుకొనే బ్రష్‌తో జుట్టు కుదుళ్ల వరకు రాసుకోవాలి.
❂ రెండు గంటల తర్వాత చల్లని నీటితో జుట్టును కడిగేయండి. తర్వాత షాపుతో తల స్నానం చేయండి.
అరటి పండు – కొబ్బరి నూనె హెయిర్ మాస్క్:
కొబ్బరి నూనె తలకు ఇన్ఫెక్షన్లు సోకకుండా కాపాడుతుంది. ఇందులో ఉన్న విటమిన్-E పొడిబారిన, దెబ్బతిన్న జుట్టును రిపేర్ చేస్తుంది. ఇందులోని విటమిన్-K చుండ్రును తగ్గిస్తుంది. కాబట్టి.. అరటిపండు-కొబ్బరి నూనె కాంబినేషన్ మాస్క్ మీ జుట్టును ఆరోగ్యంగా ఉంచుతుంది.
ఇలా చేయండి:
❂ రెండు అరటి పండ్లును ముక్కలుగా చేసుకుని బాగా పేస్టులా కలపండి. అందులో రెండు టీ స్పూన్ల కొబ్బరి నూనె వేయండి. ఒక టేబుల్ స్పూన్ కొబ్బరి పాలు వేసవి బాగా కలపండి.
❂ తర్వాత జుట్టు కుదుళ్లలోకి మిశ్రమం వెళ్లేలా తలకు పూసుకోవాలి.
❂ 30 నిమిషాల తర్వాత చల్లని నీటితో శుభ్రం చేసుకోండి. ఆ తర్వాత షాంపుతో తలను స్నానం చేయండి.
అరటి పండు – పాలు హెయిర్ మాస్క్:
పాలలో ఉండే పోషకాలు గురించి ప్రత్యేకంగా చెప్పుకోవక్కర్లేదు. పాలు మీ జుట్టును ఎదుగుదలకు, బలోపేతం చేయడానికి, మాయిశ్చరైజ్ చేసేందుకు ఉపయోపడుతుంది. పొడిబారిన, చింపురుగా ఉండే జుట్టును సరిచేయగల ఔషదం పాలే. అరటిపండ్లు-పాల మిశ్రమంతో మరింత మెరుగైన ఫలితం కనిపిస్తుంది.
ఇలా చేయండి:
❂ అరటి పండును ముక్కలుగా చేసి పేస్టులా కలపండి. అందులో పాలు వేసి మరింత మెత్తగా కలపండి.
❂ ఆ మిశ్రమాన్ని జుట్టు కుదుళ్ల వరకు వెళ్లేలా రాసుకోండి.
❂ 30 నిమిషాల తర్వాత చల్లని నీటితో జుట్టును శుభ్రం చేసుకోండి. అనంతరం షాంపుతో తల స్నానం చేయండి.
అరటి పండు – తేనె హెయిర్ మాస్క్:
తేనె సహజ మాయిశ్చరైజర్‌గా పనిచేస్తుంది. తలను శుభ్రం చేస్తుంది. తలను సిల్కీ స్మూత్‌గా ఉంచుతుంది. తేనెకు అరటి పండ్లు కలిపి తలకు పట్టించడం ద్వారా మరిన్ని సత్ఫలితాలు కనిపిస్తాయి.
ఇలా చేయండి:
❂ అరటి పండును ఒక గిన్నెలోకి తీసుకుని మెత్తగా అయ్యేలా పేస్టు చేయండి. అందులో అర టీస్పూన్ తెనె వేసి బాగా కలపండి.
❂ అనంతరం దాన్ని తలకు రాసుకుని 20-30 నిమిషాలు వదిలేయండి.
❂ తర్వాత గోరువెచ్చని నీటితో శుభ్రం చేసుకుని తల స్నానం చేయండి.
✺ ఇవే కాకుండా అరటి పండు గుజ్జులో గుడ్డు, అవోకాడో, ఆలివ్ ఆయిల్‌ వేసి కూడా హెయిర్ మాస్కులను తయారు చేయొవచ్చు. మీరు అటరి పండు గుజ్జు పేస్టులా ఉండేలా చూసుకోండి. లేకపోతే.. అవి తలలో ఉండిపోయి ఇబ్బంది పెడతాయి. అలాగే, అవి తలలో డ్రై అయినట్లయితే మరింత ఇబ్బందిగా ఉంటుంది. కాబట్టి తలకు ఉన్న మాస్క్ పొడిబారకుండా కవర్ లేదా గుడ్డను తలకు చుట్టుకోండి. అరటి పండ్లతో అలర్జీ ఉండేవారు ఈ మాస్కులు ఉపయోగించవద్దు.
